Маці экс-тэлевядучага АНТ Падрэза не выселілі з яго кватэры

Крыніца: старонка Івана Падрэза ў "Фэйсбуку"

14 ліпеня, Позірк. 78-гадовую маці былога тэлевядучага канала АНТ Івана Падрэза не выселілі з жылля, якое яму належыць.

“Мама можа жыць у кватэры па праве пражывання. Аказваецца, і на тым баку ёсць людзі. Людзям — дзякуй. І дзякуй усім, хто перажываў. Няма падставы для суму”, — напісаў Падрэз на сваёй старонцы ў “Фэйсбуку”.

12 ліпеня ён паведаміў на сваёй старонцы ў “Інстаграме” пра “канфіскацыю кватэры”. Пры гэтым, паводле слоў мужчыны, з кватэры “выкінулі” яго маці.

“Яна правяла тры тыдні ў шпіталях, а потым у сяброўкі”, — напісаў Падрэз. Такія паводзіны ўладаў, на яго думку, “выходзяць за рамкі ўсякай маралі”.

Падрэз займаў 12-е месца ў спісе “Хопіць баяцца” на выбарах у Каардынацыйную раду (КР), якія прайшлі 25–27 траўня.

Па выніках выбараў спіс атрымаў 3 месцы, экс-тэлевядучы ў КР не ўвайшоў.

8 траўня Камітэт дзяржаўнай бяспекі ў ліку іншых прызнаў “экстрэмісцкім фарміраваннем” кааліцыю “Хопіць баяцца”. У адпаведным спісе КДБ пералічаныя грамадзяне, якія маюць дачыненне да 12 спісаў на выбарах у КР, у тым ліку і Падрэз.

Супраць усіх 257 кандыдатаў у КР былі распачатыя крымінальныя справы, у рамках якіх, паводле інфармацыі, у прыватнасці, кіраўніка Народнага антыкрызіснага ўпраўлення Паўла Латушкі, праводзілася канфіскацыя маёмасці, якая належыць ім у Беларусі.