19 ліпеня, Позірк. Беларускія памежнікі 18 ліпеня знайшлі на мяжы з Латвіяй дзве групы замежнікаў, збітых, як сцвярджаецца, сілавікамі суседняй краіны.
Шасцёра грамадзян Афганістана і Пакістана былі выяўленыя “паблізу брамкі для жывёл у латвійскай памежнай загародзе”. Са спасылкай на мігрантаў Дзяржпагранкамітэт заяўляе, што іх “затрымалі латвійскія сілавікі і жорстка збілі, а пасля выштурхнулі” на беларускую тэрыторыю. Паведамляецца, што медыкі дыягнаставалі ў іх “шматлікія гематомы, пераломы і ранкі”, у аднаго замежніка “выявілі ўнутраны крывацёк”.
“Пазней памежнікі знайшлі яшчэ двух мужчын у шокавым стане, — заяўляе ведамства. — Грамадзянін Індыі і афганец таксама знаходзіліся паблізу мяжы з Латвіяй. Ад шматлікіх удараў па галаве і іншых частках цела ў мужчын засталіся гематомы і ранкі, а таксама сляды ад выкарыстання электрашокера. На нагах зафіксаваныя траўмы, падобныя да слядоў ад прымянення гумавых куль”.
Усіх пацярпелых замежнікаў даставілі ў Браслаўскую цэнтральную раённую бальніцу (Віцебская вобласць).
Следчы камітэт Беларусі назваў тое, што адбылося, “расісцкім адборам”. Замежнікі, як сцвярджаецца, паведамілі следчаму, што “наткнуліся на латвійскіх вайскоўцаў, якія іх жорстка збілі, а таксама па традыцыі здзекаваліся, выкарыстоўваючы электрашокер”.
“Прычыніўшы безабаронным людзям калецтвы, найміты ў форме пад пагрозай смерці вымусілі іх пайсці ў Беларусь. Кожны факт жорсткасці латвійскіх вайскоўцаў зафіксаваны следчым Верхнядзвінскага раённага аддзела Следчага камітэта”, — заяўляе СК.
Праведзены “Позіркам” аналіз даных памежных службаў сведчыць, што 18 ліпеня Латвія прадухіліла рэкордную для 2024 года сутачную колькасць спробаў мігрантаў незаконна трапіць з боку Беларусі — 81, ад пачатку месяца — 628, года — 3.193.
