МУС: У 2024 годзе пры купанні загінула 76 чалавек, у тым ліку 11 непаўналетніх

27 ліпеня, Позірк. Купальны сезон гэтага лета не стаў выключэннем у папаўненні “сумнай статыстыкі ахвяр вады”, заявіў намеснік начальніка аддзела галоўнага ўпраўлення аховы, правапарадку і прафілактыкі МУС Аляксей Чувакоў.

У відэакаментарыі, апублікаваным 27 ліпеня прэс-службай ведамства, міліцэйскі чыноўнік паведаміў, што “сёлета, грэбуючы мерамі асабістай бяспекі пры купанні, ужо загінула 76 чалавек, у тым ліку 11 непаўналетніх”.

Чувакоў падкрэсліў, што найбольшая небяспека існуе для грамадзян ў стане ап’янення”, і нагадаў пра забарону на распіццё спіртных напояў у зонах адпачынку і на пляжах.

Прадстаўнік МУС заклікаў грамадзян кантраляваць дзяцей, не пакідаць іх без нагляду, пастаянна нагадваць “аб правілах паводзін на вадзе, небяспеках гульняў, нырання і купання ў забароненых месцах”.

“Для адпачынку на вадзе выбірайце толькі адмыслова адведзеныя для гэтага месцы. На тэрыторыі рэспублікі вызначана каля 480 такіх аб’ектаў”, — сказаў Чувакоў.

Паводле даных Беларускага рэспубліканскага таварыства ратавання на водах (АСВОД), у першым паўгоддзі ў Беларусі патанула 157 чалавек, у тым ліку 12 непаўналетніх. Найменшая колькасць выпадкаў гібелі на вадзе зафіксаваная ў Мінску (8), найбольшая — у Мінскай вобласці (32). 61 патанулы (39%) быў у нецвярозым стане.

За студзень — чэрвень гэтага года выратавана 102 чалавекі, у тым ліку 25 непаўналетніх.

За першае паўгоддзе 2023 года ад утаплення загінуў 141 чалавек. Такім чынам, за аналагічны перыяд 2024-га патанула на 11% больш.