Украінскае аб’яднанне “За дэмакратычную Беларусь” у гадавіну выбараў заклікала да падтрымкі беларусаў

9 жніўня, Позірк. Міжфракцыйнае аб’яднанне “За дэмакратычную Беларусь” у Вярхоўнай радзе Украіны ў чацвёртую гадавіну прэзідэнцкіх выбараў 9 жніўня 2020 года заклікала партнёраў “падтрымаць беларусаў, якія працягваюць змагацца з рэжымам [Аляксандра] Лукашэнкі ўнутры краіны і за яе межамі”.

Дакумент, прысвечаны гадавіне, апублікаваў яго кіраўнік Аляксей Ганчарэнка ў сацсетцы Х. У ім адзначаецца, што за мінулыя чатыры гады праз палітычныя рэпрэсіі “самаабвешчанага прэзідэнта Лукашэнкі і ягоных паплечнікаў” у Беларусі прайшло не менш за 50 тыс. чалавек.

Парламенцкі блок нагадвае, што Лукашэнка, “які знаходзіцца ва ўладзе 30 гадоў, адкрыта ганарыцца званнем “апошняга дыктатара Еўропы” і “зрабіў усё, каб краіна стала дэ-факта акупаваная Расіяй”.

“Цяпер дыктатар працягвае пашыраць супрацоўніцтва з іншымі аўтарытарнымі рэжымамі — Іранам і Паўночнай Карэяй — працягваючы аддаляць Беларусь ад дэмакратычнага і эканамічнага развіцця”, — адзначылі ў аб’яднанні.

Лукашэнка, зазначаецца ў заяве, павінен знаходзіцца не ў прэзідэнцкім палацы, а “ў Гаазе на лаве падсудных”.

Таксама гучыць заклік да прэзідэнта Ўладзіміра Зяленскага, Кабінету міністраў і Вярхоўнай радзе аб прызнанні на дзяржаўным узроўні Беларусі краінай, дэ-факта акупаванай Расіяй.