Хрэнін “яшчэ раз” давёў міралюбную палітыку Беларусі да “заходніх псеўдааналітыкаў, гаваруноў і проста экстрэмістаў”

19 студзеня, Позірк. “Я яшчэ раз заяўляю: ворагаў у нас няма. У сваёй палітыцы мы ні на каго азірацца і падладжвацца не збіраемся. У нас ёсць інтарэсы нашых народаў, ёсць узаемныя саюзніцкія абавязацельствы”, — заявіў міністр абароны Віктар Хрэнін 19 на брыфінгу, прысвечанм абноўленай Ваеннай дактрыне Беларусі.

Паводле яго слоў, якія перадае прэс-служба ваеннага ведамства, “толькі гэтыя фактары будуць стаяць на чале ўсіх нашых рашэнняў і дзеянняў, як самастойна, так і ў рамках Саюзнай дзяржавы”.

“Хачу давесці пазіцыю ваеннага ведамства да тых заходніх псеўдааналітыкаў, гаваруноў і проста экстрэмістаў, якія ўжо амаль тыдзень не змаўкаюць, выдаючы розныя прагнастычныя сцэнары і ацэнкі новай Ваеннай дактрыны і адносінам Рэспублікі Беларусь і Расійскай Федэрацыі, у тым ліку па пытаннях прымянення ядзернай зброі”, — сказаў Хрэнін.

У цэлым, на яго думку, дактрына ў новай рэдакцыі “атрымалася ўзважанай і выверанай”, яна “адпавядае нашай Канстытуцыі і ўзятым Рэспублікай Беларусь на сябе міжнародным абавязацельствам”.

Хрэнін сцвярджае, што прыняцце дакумента дазволіць прасунуцца ў некалькіх кірунках, у тым ліку дапаможа “данесці да міжнароднай грамадскасці міралюбную палітыку і адсутнасць варожасці да каго б ні было”, а таксама паскорыць прыняцце рашэнняў, накіраваных на “забеспячэнне ваеннай бяспекі як у мірны час, так падчас ваенных дзеянняў”.

Пры гэтым, дадаў міністр, у выпадку ўзброенага канфлікту дактрына будзе спрыяць рэалізацыі “шырокага спектру неваенных мер, накіраваных на перамогу ў вайне і завяршэнне яе на прымальных умовах для Рэспублікі Беларусь”.

Абноўленая Ваенная дактрына была разгледжана 16 студзеня ў рамках абмеркавання Канцэпцыі нацыянальнай бяспекі на пасяджэнні Савета бяспекі з удзелам Аляксандра Лукашэнкі.

Па выніках пасяджэння Хрэнін заявіў, што ў Ваеннай дактрыне “дакладна вызначылі і даводзім погляды Рэспублікі Беларусь на прымяненне размешчанай на нашай тэрыторыі тактычнай ядзернай зброі”.

Паводле слоў кіраўніка Мінабароны,” духам дактрыны” з’яўляецца “міралюбны характар нашага народа”, пры гэтым “Рэспубліка Беларусь не разглядае ні адзін народ як свайго ворага, нягледзячы на дзеянні іх урадаў”. У той жа час у дакуменце “выразна называюцца крыніцы ваенных пагроз нашай краіне”.

У той жа дзень прадстаўнік Аб’яднанага пераходнага кабінета (АПК) па міжнародных справах Валерый Кавалеўскі заявіў, што дактрына з’яўляецца “яшчэ адной спробай незаконнага кіраўніка разбурыць міжнародныя дамоўленасці аб нераспаўсюджванні ядзернай зброі”.

На сваёй старонцы ў сацсетцы “X” (былы “Твітар”) ён звярнуў увагу, што канцэпцыя “прадугледжвае кантроль над тактычнай ядзернай зброяй, якую Расія вырашыла размясціць у Беларусі”.

У сувязі з гэтым дактрына ўяўляе сабой “абуральны крок”, які заслугоўвае “адкрытага і выразнага адказу з боку ўпраўлення ААН па пытаннях раззбраення”, падкрэсліў Кавалеўскі.

Рашэнне аб распрацоўцы праекта новай Ваеннай дактрыны было прынята пасля адабрэння новай рэдакцыі Канцэпцыі нацбяспекі ў лютым 2023 года.

У дакуменце раскрыты змест ваеннай палітыкі краіны. У прыватнасці, сцвярджаецца, што “Беларусь — міралюбная краіна, нікому не пагражае, але спробы ўмяшання ва ўнутраныя справы, а тым больш пагроза прымянення ваеннай сілы або агрэсія будуць спыняцца з выкарыстаннем усяго патэнцыялу дзяржавы”.

Пасля адабрэння Саветам бяспекі праектаў канцэпцыя і дактрына будуць вынесены на зацвярджэнне Усебеларускага народнага сходу.