Закрываецца прыватны Інстытут прадпрымальніцкай дзейнасці

24 чэрвеня, Позірк. Інстытут прадпрымальніцкай дзейнасці (ІПД) спыніць працу з 1 верасня.

Паводле інфармацыі на сайце прыватнай ВНУ, “заснавальнікам і кіраўніцтвам ІПД прынята рашэнне аб спыненні адукацыйнай ліцэнзуемай дзейнасці”, таму прыёму абітурыентаў у 2024 годзе не будзе.

Студэнтаў інстытута перавядуць у іншыя ўстановы, якія “рэалізуюць адпаведныя адукацыйныя праграмы”. “Кіраўніцтвам ІПД і заснавальнікам распрацоўваецца план мерапрыемстваў, скіраваных на забеспячэнне пераводу навучэнцаў”, — гаворыцца ў заяве.

Тыднем раней стала вядома, што працу спыняе іншая прыватная ВНУ — Універсітэт права і сацыяльных тэхналогій (БІП). Афіцыйна пра гэта не паведамлялася, інфармацыю са спасылкай на чытачоў распраўсюдзілі беларускія СМІ.

Абодва ўніверсітэты працавалі ў краіне з 1990-х гадоў.

20 верасня 2022 года Аляксандр Лукашэнка на сустрэчы з дзяржсакратаром Савета бяспекі Аляксандрам Вальфовічам запатрабаваў “зачысціць усё да немагчымасці ў сістэме адукацыі”. Пасля гэтага ў краіне былі закрытыя амаль усе прыватныя дзіцячыя сады і школы.