Дарадца прэзідэнта Літвы: Закрыццё двух памежных пунктаў з Беларуссю дазволіць узмацніць абарону мяжы

7 жніўня, Позірк. Закрыццё на мяжы з Беларуссю двух пунктаў пропуску дазволіць літоўскім службам “вырашыць арганізацыйныя пытанні” і пераразмеркаваць сілы, заявіў 7 жніўня ў эфіры радыё LRT дарадца прэзідэнта Літвы Дарус Урбонас.

“У гэтых пунктах нам не хапае некаторага абсталявання, каб вельмі эфектыўна змагацца з кантрабандай, — адзначыў ён. — Калі б гэтыя пункты былі зачыненыя, мы, вядома, маглі б накіраваць тыя магчымасці, якія ёсць сёння, у іншыя месцы, узмацняючы абарону нашай. знешняй мяжы”.

Намеснік кіраўніка Службы аховы дзяржаўнай мяжы Саўлюс Некрашэвічус заявіў балтыйскаму інфармагенцтву BNS, што закрыццё часткі дзейных памежных пунктаў на мяжы з Беларуссю “знізіць рызыку сутыкнення з пагрозамі”. Паводле яго слоў, пункты Шумскас і Цвярачус (з беларускага боку — Лоша і Відзы адпаведна) адрозніваюцца “абмежаванай здольнасцю прапускаць транспартныя сродкі і людзей”.

4 жніўня міністр унутраных спраў Польшчы Марыюш Каміньскі і яго літоўская калега Агне Білатайце ўзгаднілі схемы рэагавання на пагрозы з боку Беларусі ў выпадку правакацый з удзелам ПВК “Вагнер”, а таксама абмеркавалі механізм, які будзе рэалізаваны “ў выпадку закрыцця ўсіх памежных пераходаў з Беларуссю і ізаляцыі рэжыму Аляксандра Лукашэнкі”.

“Мы знаходзімся ў кантакце з нашымі сябрамі з Літвы і Латвіі, паколькі яны таксама падвяргаюцца падобным правакацыям. Варыянт поўнай ізаляцыі Беларусі ў выпадку сур’ёзных інцыдэнтаў з удзелам вагнераўцаў на межах краін НАТО і ЕС <…>, безумоўна, будзе прыняты намі як сумесныя захады”, — падкрэсліў Каміньскі.

Паводле яго слоў, калі Польшча і Літва палічаць закрыццё межаў “правільнай рэакцыяй”, то такія дзеянні “прывядуць да поўнай ізаляцыі Беларусі”. “Беларускі рэжым павінен гэта ўсведамляць”, — заявіў кіраўнік МУС Польшчы.

4 жніўня віцэ-міністр унутраных спраў Літвы Арнольдас Абрамавічус заявіў, што Вільнюс мае намер у хуткім часе закрыць два пункты пропуску на мяжы з Беларуссю.

Раней прэзідэнт Літвы Гітанас Наўседа заявіў, што краінам Балтыі і Польшчы, верагодна, давядзецца закрыць мяжу з Беларуссю, калі сітуацыя з бяспекай пагоршыцца ў святле знаходжання на беларускай тэрыторыі наймітаў ПВК “Вагнер”.

Пры гэтым кіраўнік літоўскай дзяржавы падкрэсліў, што гэта будзе “крайняя мера”.

3 жніўня міністр тэхналогій і развіцця Польшчы Вальдэмар Буда заявіў, што нарастанне пагрозы прымушае польскія ўлады “глыбока задумацца пра магчымае закрыццё ўсіх памежных пераходаў з Беларуссю”.