На ўдзельнікаў ініцыятывы “Кадравы рэзерв для новай Беларусі” заведзена крымінальная справа — СК (дапоўнена)

14 лютага, Позірк. Следчы камітэт завёў крымінальную справу ў дачыненні да “прадстаўнікоў і ўдзельнікаў экстрэмісцкага фармавання “Кадравы рэзерв для новай Беларусі”, паведамляе прэс-служба ведамства.

Ім інкрымінавана ч. 3 арт. 361¹ КК (стварэнне экстрэмісцкага фармавання альбо ўдзел у ім).

СК адзначае, што некаторыя абвінавачаныя знаходзяцца ў Беларусі.

Да астатніх “устаноўленых удзельнікаў, якія знаходзяцца за мяжой”, будзе прыменена працэдура спецыяльнай вытворчасці, якая дазваляе судзіць іх завочна.

Афіцыйны прадстаўнік СК Сяргей Кабаковіч заявіў, што “Кадравы рэзерв для новай Беларусі” стварыла “самаабвешчаны лідар сваёй люстраной “экстрэмісцкай Беларусі” Ціханоўская і яе памагатыя” з мэтай атрымання ад “калектыўнага Захаду” новых спосабаў фінансавання “пад свае гульні ў транзіт дзяржаўнай улады ў краіне”.

Як выказаўся Кабаковіч, ініцыятыва з’яўляецца “кузняй кадраў для псеўдадзяржавы”, ідэі якога прыхільнікі Ціханоўскай “прагнуць насаджаць на тэрыторыі Рэспублікі Беларусь пасля сілавога захопу ўлады ў краіне”.

На яго думку, у дэмакратычнай апазіцыі ёсць план: “Стварыць з экстрэмістаў, якія ненавідзяць існуючы ў краіне парадак, “даўбешку” для прызначэння на дзяржаўныя пасады, узброена ўварвацца на тэрыторыю краіны, правесці масавыя люстрацыі ў дачыненні да адданых радзіме прадстаўнікоў улады: праваахоўнікаў, грамадскіх дзеячаў, прывезці паплечнікаў-радыкалаў, каб разарваць краіну і знішчыць усё, што было створана за апошнія 30 гадоў”.

На паведамленне СК адрэагаваў прапагандыст тэлеканала АНТ Ігар Тур, які ў сваім тэлеграм-канале заявіў, што некаторыя ўдзельнікі праграмы ўжо затрыманыя.

Супрацоўнікі АНТ і КДБ на працягу года слухалі лекцыі праграмы навучання “Кадравы рэзерв для новай Беларусі” і валодаюць поўным спісам студэнтаў, сцвярджае Тур. Ён анансаваў сюжэт на тэму ў вячэрнім эфіры тэлеканала 14 лютага.

17 траўня 2023 года Камітэт дзяржбяспекі прызнаў праграму навучання “Кадравы рэзерв для новай Беларусі” “экстрэмісцкім фармаваннем”.

Сцвярджалася, што нейкая група грамадзян “ажыццяўляе экстрэмісцкую дзейнасць” праз “шэраг сеткавых рэсурсаў”, “пры садзейнічанні і пад эгідай т.зв. “Аб’яднанага пераходнага кабінета” і “Народнага антыкрызіснага ўпраўлення”. Сярод такіх рэсурсаў былі названыя сайты pr-belarus.org і edu.pr-belarus.org, а таксама звязаныя з імі тэлеграм- і ютуб-каналы, старонкі ў “Фэйсбуку”, “Інстаграме”, акаўнт у LinkedIn.

Пра пачатак кампаніі “Кадравы рэзерв для новай Беларусі” АПК абвясціў 15 лістапада 2022 года. Юрась Губарэвіч тады паведаміў, што створана платформа, дзе можна запоўніць заяўку на ўдзел. Адзначалася, што падрыхтоўка новых кадраў будзе весціся праз стажыроўкі ў краінах Еўрасаюза.

Сёлета на пачатку лютага АПК уключыў праект у справаздачны спіс сваіх дасягненняў. Паведамлялася, што ў рамках ініцыятывы апрацавана 170 заявак на навучанне, 17% якіх падалі асобы, якія працуюць у дзяржсектары; сфармаваны план пілотнай адукацыйнай праграмы.

16 лістапада 2023 года Аб’яднаны пераходны кабінет абвясціў аб пачатку навучання другога набору ўдзельнікаў праграмы “кадравы рэзерв”, якая накіравана на прафесійнае развіццё ў сферы дзяржаўнага і мясцовага кіравання. Паведамляецца, што да праграмы навучання далучылася 168 чалавек, якія прайшлі ўваходны тэст.

Акрамя згаданых праграм навучання, прапанаваных два разы на год, у рамках “Кадравага рэзерву для новай Беларусі”, удзельнікамі якога цяпер з’яўляецца 641 чалавек, праводзяцца і іншыя мерапрыемствы. У прыватнасці, 10 удзельнікаў летась з 18 па 21 верасня наведалі Германію, дзе, як паведамлялі арганізатары, “атрымалі практычныя веды аб рабоце органаў кіравання краін Еўрасаюза, паглыбіліся ў вывучэнне нямецкага досведу ў галіне дзяржаўнага кіравання, здабылі важныя інсайты і пазнаёміліся як з перадавым досведам, так і з памылкамі ў дзяржкіраванні, якія варта ўлічваць у пабудове і развіцці нашай уласнай краіны”.

Запланаваныя падобныя візіты ўдзельнікаў праграмы ў органы дзяржаўнага кіравання Польшчы і Літвы.