За паўгоддзе менш за 1% пробаў прадуктаў паказала перавышэнне па цэзію-137 — Мінздароўя

29 ліпеня, Позірк. У студзені — чэрвені 2024 года на ўтрыманне радыенуклідаў даследавана 9.614 пробаў харчовых прадуктаў перапрацоўчых арганізацый (5.947) і асабістых падсобных гаспадарак (3.667), паведамляе Міністэрства аховы здароўя са спасылкай на санэпідслужбу.

На наяўнасць цэзію-137 даследавана 8.486 проб (перапрацоўшчыкі — 4.893, асабістыя гаспадаркі — 3.593), стронцыю-90 — 1.128 (1.054 і 74 адпаведна).

У ходзе даследавання прадукцыі перапрацоўчых арганізацый выяўлена адно перавышэнне па цэзію-137 — у пробе грыбоў з Магілёўскай вобласці.

Праверка прадукцыі, вырашчанай у асабістых гаспадарках, а таксама здабытай грамадзянамі падчас збору, палявання і рыбалкі, паказала перавышэнне па цэзію-137 у 75 пробах: у лясных грыбах — 47, ягадах — 14, мясе дзікіх жывёл — 11, іншым — 3. Усе пробы былі з Гомельскай і Магілёўскай абласцей.

Такім чынам, з 8.486 пробаў на цэзій-137 перавышэнне выяўленае ў 76 (0,9%).

Перавышэння па стронцыю-90 нідзе не выяўлена.