У Мінску ад сардэчнага прыступу памёр амбасадар Сірыі
15 жніўня, Позірк. Амбасадар Сірыі ў Беларусі Махамад аль-Умрані памёр 15 жніўня, паведамляе дыпмісія гэтай арабскай дзяржавы.
МЗС Сірыі паведаміў, што прычынай смерці дыпламата стаў сардэчны прыступ.
Даверчыя граматы Аляксандру Лукашэнку сірыйскі дыпламат уручыў 3 лістапада 2020 года. Выступаючы на цырымоніі, Лукашэнка назваў “трывалымі” ўсталяваныя паміж Мінскам і Дамаскам адносіны.
Яны, на яго думку, “характарызуюцца высокім даверам і шчырым сяброўствам”: “Беларусь актыўна падтрымлівае суверэнітэт, тэрытарыяльную цэласнасць і выступае за неўмяшанне ва ўнутраныя справы Сірыі”.
29 сакавіка 2022 года аль-Умрані на сустрэчы з тагачасным старшынём Палаты прадстаўнікоў Уладзімірам Андрэйчанкам заявіў, што “Беларусь адчувае на сабе ціск, які палягае ў выглядзе санкцый і эканамічнай блакады”. “Мы адчувалі на сабе падобныя меры ўздзеяння. Хачу запэўніць, што мы салідарныя з вашай краінай у супрацьстаянні гэтым санкцыям”, — падкрэсліў дыпламат.
Наведваючы 3 верасня 2023 года Гарадок (Віцебская вобласць) амбасадар адзначыў, што другі раз прысутнічае на Дні беларускага пісьменства.
“Летась быў у Добрушы (Гомельская вобласць), цяпер прыехаў сюды. Вельмі добра, што ёсць такое свята, якое падкрэслівае важнасць мовы, нацыянальнай культуры для грамадства. Беларуская культура вельмі багатая. Відаць, што ў вашай краіне ёю шануюць і захоўваюць”, — падкрэсліў аль-Умрані.
Дыпламатычныя адносіны паміж Беларуссю і Сірыяй устаноўлены 26 жніўня 1993 года. З лістапада 1998-га функцыянуе амбасада Беларусі ў Дамаску, з ліпеня 2007-га — амбасада Сірыі ў Мінску.
