Работнікаў прадпрыемства перасцераглі ад свабоднага выкарыстання інтэрнета на прыкладзе крымінальнай справы калегі

16 жніўня, Позірк. “Дэструктыўная дзейнасць” у інтэрнэце разгледжана падчас “адзінага дня інфармавання” для работнікаў ААТ “Гомельскі домабудаўнічы камбінат”, паведамляе прэс-служба Палаты прадстаўнікоў.

Зроблена гэта “на прыкладзе ⟨…⟩ узбуджэння крымінальнай справы ў дачыненні да работніка прадпрыемства з удзелам следчага Гомельскага гарадскога аддзела Следчага камітэта”.

У сустрэчы прыняла ўдзел член пастаяннай камісіі ПП НС па жыллёвай палітыцы, гандлі і будаўніцтве Анжэліна Сырамятнікава. Дэпутат заявіла, што “свабодны доступ у інтэрнэт — палка аб двух канцах”.

“З аднаго боку — імгненны адказ на пытанне, якое цікавіць, магчымасць сувязі з любой краінай свету і зносіны з любой медыйнай асобай. З іншага боку, — гэта велізарны паток інфармацыі, які абрушваецца на неакрэплыя дзіцячую псіхіку і розумы пажылых людзей, інфармацыя, якую неабходна фільтраваць шляхам захавання інфармацыйнай гігіены”, — цытуе яе прэс-служба ніжняй палаты.

Парламентарый сцвярджае, што “ў ход ідзе ўсё: перапісванне гісторыі, падтасоўка фактаў, разбурэнне традыцыйных сямейных каштоўнасцяў і духоўна-маральных асноў хрысціянства”.

53-гадовая Сырамятнікава — ураджэнка Расіі (г. Кандалакша Мурманскай вобласці). Раней займала пасаду намесніка генеральнага дырэктара па кадрах, ідэалагічнай і сацыяльнай рабоце названага прадпрыемства.

У 2023 годзе Міністэрства інфармацыі заблакавала доступ да 3.388 рэсурсаў і іх “люстэркаў”, паведаміў 14 жніўня намеснік кіраўніка адміністрацыі Аляксандра Лукашэнкі, былы кіраўнік ведамства Уладзімір Перцоў на сустрэчы з “ідэалагічным актывам Мінскай вобласці”.

“Гэта і прапагандысцкія дэструктыўныя экстрэмісцкія рэсурсы, і шматлікія праявы ў інтэрнэце медыяпадобных, так званых мімікрыруючых пад журналістыку аўтараў, якія выконваюць сваю функцыю ўздзеяння на нявызначаныя, лаяльныя або колы нашай аўдыторыі, якія думаюць крыху інакш”, — сказаў ён.

Улады Беларусі змагаюцца з любой інтэрпрэтацыяй падзеяў у краіне і за мяжой, якая не стасуецца з афіцыйнай прапагандай. У краіне не засталося незалежных СМІ, большая частка з іх была разгромлена і вымушана працуе за мяжой. Дзейнасць медыя дэ-факта крыміналізавана.

За распаўсюджванне “экстрэмісцкіх матэрыялаў” прадугледжана адміністрацыйная адказнасць.