За 2023 год Мінінфарм заблакаваў доступ да 3.388 рэсурсаў

14 жніўня, Позірк. У 2023 годзе Міністэрства інфармацыі заблакавала доступ да 3.388 рэсурсаў і іх “люстэркаў”, якія тычацца продажу наркотыкаў, парнаграфіі, “рэкрутуюць і распавядаюць” аб розных “экстрэмісцкіх фармаваннях”, паведаміў 14 жніўня намеснік кіраўніка адміністрацыі Лукашэнкі, былы кіраўнік ведамства Уладзімір Пярцоў на сустрэчы з “ідэалагічным актывам Мінскай вобласці”.

“Гэта і прапагандысцкія дэструктыўныя экстрэмісцкія рэсурсы, і шматлікія праявы ў інтэрнэце медыяпадобных, так званых мімікрыруючых пад журналістыку аўтараў, якія выконваюць сваю функцыю ўздзеяння на колы нашай аўдыторыі, якія не вызначыліся, ёсць лаяльнымі або думаюць троху інакш”, — цытуе Пярцова Мінінфарм.

Экс-міністр узгадаў “негатыўны досвед 2020 года” і ў сувязі з гэтым заявіў, што “калі мы дзесьці праспім”, то ў Беларусі з’явяцца цэнтры “інфармацыйна-псіхалагічных спецыяльных аперацый, якія пераследуюць пэўныя мэты ў інтарэсах дзяржаў і спецыяльных службаў, якія іх змяшчаюць”.

На думку Пярцова, Беларусі супрацьстаяць “тэхналагічныя гіганты з недружалюбных дзяржаў, кіраваныя карпарацыямі і людзьмі, якія пераследуюць глабальныя, у тым ліку геапалітычныя і эканамічныя мэты ў дачыненні да ў цэлым калектыўнага Усходу, не толькі нашай краіны”.

Пярцоў прызнаў, што беларусы ўсё часцей шукаюць навіны ў сацсетках і месенджарах, “усе гэтыя платформы шмат у чым не нашы, належаць яны далёка не дружалюбным краінам і карпарацыям”.

“Таму многія з іх мяняюць правілы гульні прама па ходзе. Мы дастаткова эфектыўна адаптуемся. Калі з іх боку будуць нейкія адкрыта недружалюбныя дзеянні, мы гатовыя ў тым ліку прымаць дастаткова рэзкія і смелыя рашэнні”, — заявіў намеснік кіраўніка адміністрацыі Лукашэнкі.

8 красавіка пры прызначэнні Пярцова намеснікам кіраўніка сваёй адміністрацыі Лукашэнка заявіў, што “ідэалагічная праца сёння выходзіць на першы план”, і загадаў падначаленаму “падцягнуць, прывесці ў парадак усе СМІ”.

Лукашэнка падкрэсліў тады, што сёння, “у гэты складаны перыяд”, актуальныя пытанні прапаганды і контрпрапаганды: “Усё сышлося цяпер на СМІ. Ідзе інфармацыйная вайна”.

28 траўня на медыяфоруме для прапагандыстаў у Магілёве Лукашэнка заявіў, што даводзіцца жыць “пад агнём пастаяннай крытыкі, хлусні, абсурдных абвінавачванняў”: “Гэта тэрабайты сфабрыкаваных і шчодра праплочаных медыйных фальшывак пад прыгожай абгорткай”.

Інфармацыйнай вайной Лукашэнка называе любую інтэрпрэтацыю падзей у Беларусі, якая не адпавядае прапагандзе. У краіне не засталося незалежных СМІ, большая частка з іх была разгромленая і вымушана працуе за мяжой.