20 жніўня, Позірк. Гродзенскі абласны суд 19 жніўня завочна прыгаварыў журналіста Уладзіміра Хільмановіча да пяці гадоў пазбаўлення волі са штрафам у памеры 1.000 базавых велічынь (40 тыс. рублёў), паведамляе “Гарадзенская праваабарона”.
Яго прызналі вінаватым паводле ч. 1. і 2 арт. 3614 (садзейнічанне экстрэмісцкай дзейнасці) і ч. 3 арт. 3611 (стварэнне экстрэмісцкага фарміравання альбо ўдзел у ім) Крымінальнага кодэкса.
Адзначаецца, што на частку маёмасці журналіста (лецішча, двухпакаёвую кватэру ў Гродне і бытавую тэхніку) накладзены арышт.
Спецыяльная вытворчасць у дачыненні да Хільмановіча была распачатая ў сакавіку. Следчы камітэт тады паведамляў, што яму інкрымінаваныя толькі ч.1 і 2 арт. 3614.
Хільмановіч — журналіст, краязнаўца, аўтар “Каляндарнага краязнаўчага даведніка Гарадзеншчыны”. Летась 1 снежня ў кватэры жонкі Хільмановіча, дзе ён жыў з 2014-га па 2021 год, сілавікі правялі ператрус. Былі канфіскаваныя жорсткі дыск кампутара, пасведчанне, 25 кніг, музычны дыск, паштовыя маркі, канверты, паштоўкі, буклеты, значкі, газеты.
