22 жніўня, Позірк. З пачатку 2024 года зарэгістравана больш за 200 выпадкаў клешчавога віруснага энцэфаліту і больш за 1.150 выпадкаў лайм-барэліёзу, што больш у 1,9 і 1,2 разы адпаведна, чым за аналагічны перыяд мінулага года, паведамляе Рэспубліканскі цэнтр гігіены, эпідэміялогіі і грамадскага здароўя.
Больш за ўсё тых, хто захварэў клешчавымі інфекцыямі — у Брэсцкай і Гродзенскай абласцях.
За 7 месяцаў 2024 года ў арганізацыі аховы здароўя па медыцынскую дапамогу з нагоды “прысмоктвання кляшчоў” звярнулася каля 20 тыс. чалавек, што на 11% больш, чым за аналагічны перыяд мінулага года, гаворыцца ў паведамленні. Найбольшая колькасць зваротаў зарэгістравана ў Гродзенскай вобласці і Мінску.
Медыкі адзначаюць, што найбольш эфектыўным сродкам прафілактыкі клешчавога віруснага энцэфаліту з’яўляецца вакцынацыя, ад лайм-барэліёзу вакцыны не існуе.
З мэтай прафілактыкі інфекцый, якія перадаюцца кляшчамі, санслужба рэкамендуе:
пры наведванні лясных і паркавых зон апранаць светлую аднатонную вопратку, на якой прасцей убачыць кляшча, максімальна закрываць рукі і ногі;
выкарыстоўваць сродкі, якія адпужваюць кляшчоў (рэпеленты);
ўжываць у ежу толькі кіпячонае казінае малако;
не дапускаць празмернага зарастання травой на дачным участку, праводзіць высечку непатрэбных кустоў і скошванне травы, а таксама дэратызацыю і акарыцыдную апрацоўку ўчастка.
