На тэрыторыю Беларусі заляцелі чарговыя беспілотнікі РФ іранскай вытворчасці — УС Украіны

26 жніўня, Позірк. У ноч на 26 жніўня ўкраінская супрацьпаветраная абарона знішчыла 99 запушчаных Расіяй ударных беспілотнікаў іранскай вытворчасці “Шахед — 131/136”, яшчэ два “перасеклі мяжу” з Беларуссю, паведаміў у сваім тэлеграм-канале камандуючы Паветраных сіл УСУ Мікалай Аляшчук.

16 ліпеня Паветраныя сілы Украіны таксама паведамлялі, што два запушчаныя расійскім бокам беспілотнікі “Шахед” былі “лакальна страчаныя” ў паветранай прасторы Беларусі.

8 жніўня беларускі дэмакратычны лідар Святлана Ціханоўская паведаміла ў сацсетцы Х, што, паводле яе звестак, у ліпені па меншай меры дзевяць расійскіх беспілотнікаў “Шахед” уварваліся ў паветраную прастору Беларусі, з іх “адзін выбухнуў, другі знік, а астатнія працягнулі палёт ва Украіну”.

Якіх-небудзь пратэстаў расійскаму боку ў сувязі са згаданымі інцыдэнтамі афіцыйным Мінскам заяўлена не было.

Пры гэтым Аляксандр Лукашэнка 10 жніўня абвінаваціў Украіну ў парушэнні беларускай паветранай прасторы беспілотнымі лятальнымі апаратамі і заявіў, што загадаў вярнуць войскі да паўднёвай мяжы.

Аб парушэннях паветранай прасторы беспілотнікамі з боку РФ перыядычна неафіцыйна паведамляе маніторынгавая група “Беларускі Гаюн”.