На факультатыўных занятках школьнікаў будуць навучаць навыкам правядзення допыту і вочнай стаўкі

31 жніўня, Позірк. Міністэрства адукацыі зацвердзіла праграму факультатыўных заняткаў “Гатовыя Радзіме служыць!” для вучняў 10–11 класаў агульнаадукацыйных школ.

Адпаведная пастанова за подпісам кіраўніка ведамства Андрэя Іванца апублікаваная 31 жніўня на Нацыянальным прававым інтэрнэт-партале.

Праграма разлічаная 69 гадзін (35 у 10-м класе, 34 — у 11-м).

Заяўляецца, што мэта факультатыўных заняткаў — “фарміраванне грамадзянскасці і патрыятызму навучэнцаў <…>, устойлівай цікавасці да прафесійнай дзейнасці, звязанай з сістэмай забеспячэння нацыянальнай бяспекі Рэспублікі Беларусь; пашырэнне, паглыбленне і сістэматызацыя ведаў па асновах прафесій, звязаных з нацыянальнай бяспекай краіны”.

Сярод задач навучання — “фарміраванне ў вучняў асабістай адказнасці за забеспячэнне нацыянальнай бяспекі <…>, смеласці і рашучасці, пачуцця калектывізму”, “паглыбленне ведаў аб гістарычным мінулым Беларусі і гераічным подзвігу беларускага народа ў гады Вялікай Айчыннай вайны”, “удасканаленне навыкаў інфармацыйнай бяспекі”, “развіццё фізічных якасцяў асобы: сілы, спрыту, хуткасці, вынослівасці”.

Навучанне будзе складацца з некалькіх блокаў: “Нацыянальная бяспека дзяржавы. Абарона Айчыны — доўг і абавязак грамадзяніна”, “Ваенная справа”, “Будучы абаронца правапарадку”, “Будучы следчы”, “Будучы памежнік”, “Будучы мытнік”, “Будучы ратавальнік”.

У рамках навучання “вайсковай справе” ў навучэнцаў будуць фарміраваць гатоўнасць да “праходжання вайсковай службы, у тым ліку матывацыі да паступлення ў вайсковыя навучальныя ўстановы”, гаворыцца ў пастанове.

Праграма гэтага блока змяшчае “наведванне вайсковай часткі”, “азнаямленне з парадкам прыняцця ваеннай прысягі”, заняткі па стралковай падрыхтоўцы. Апошнія, згодна з дакументам, будуць уключаць “парадак няпоўнай разборкі і зборкі аўтамата Калашнікава”, навучанне “падрыхтоўцы да стральбы, правільнага прыцэльвання, тэхнікі стральбы з пнеўматычнай (малакалібернай) вінтоўкі”.

У пастанове таксама гаворыцца аб страявой падрыхтоўцы: навучэнцам трэба будзе асвоіць “выкананне каманд “Станавіся”, “Раўняйся”, “Смірна”, “Вольна”, “Адставіць”, “Разыйдзіся”, і інш.

У рамках навучання “прыёмам рукапашнага бою” старшакласнікам прапануюць асвоіць у тым ліку “ўдары рукой (прамы, бакавы, знізу) і нагой (прамы, збоку, знізу); прыёмы абароны ад удараў нагой і рукой (сыходы, падстаўкі, адбівы)”, “самаабароне ад захопаў”.

“Будучых абаронцаў правапарадку” мяркуецца матываваць да “службы ў праваахоўных органах” і “паступлення ў навучальныя ўстановы Міністэрства ўнутраных спраў”. Таксама сярод іншага ім трэба будзе “ўдасканальваць веды аб спецыяльнай тэхніцы і ўзбраенні ў органах унутраных спраў”, “удасканальваць навыкі валодання стралковай зброяй”, “фарміраваць пачатковыя навыкі валодання прыёмамі рукапашнага бою”. Прадугледжаныя практычныя заняткі па страявой і фізічнай падрыхтоўцы.

У блоку “Будучы следчы” пастанова прадугледжвае “забеспячэнне асваення навучэнцамі практычнымі прыёмамі і навыкамі правядзення асобных следчых дзеянняў (допыту, вочнай стаўкі, прад’яўлення для апазнання, агляду месца здарэння)”.

Акрамя гэтага, школьнікаў азнаёмяць з “прынцыпамі і падставамі прымянення фізічнай сілы супрацоўнікам Следчага камітэта пры выкананні службовых абавязкаў”.

Таксама ў гэтай частцы праграмы вылучаныя навучальныя гадзіны на “вывучэнне і адпрацоўку асноўных прыёмаў самаабароны: вызваленне ад захопаў і задушвання; абаронныя дзеянні ад удару рукой, нагой, прадметам”.