СК абвінаваціў латвійскіх сілавікоў у “зверствах” у дачыненні да трох афганцаў на мяжы

31 жніўня, Позірк. Пра “чарговыя факты зверстваў” на латвійска-беларускай мяжы паведаміла 31 жніўня прэс-служба Следчага камітэта.

Ведамства заяўляе, што 30 жніўня ў Браслаўскім раёне (Віцебская вобласць) выяўленыя “трое збітых замежнікаў” — грамадзяне Афганістана “ва ўзросце ад 33 да 36 гадоў”.

Сцвярджаецца, што яны былі збітыя на тэрыторыі сумежнай дзяржавы “латвійскімі карнікамі ў форме”.

У рэлізе прадстаўнікі сілавых структур Латвіі з невядомых прычын называюцца таксама “замежнымі наймітамі”.

“Следчаму пацярпелыя распавялі, што на тэрыторыі Латвіі іх жорстка збівалі. На просьбу аб літасці, “вайскоўцы” пачалі наносіць удары дубінкамі і ўжываць электрашокер, пасля чаго прымусілі іх перасекчы мяжу Беларусі”, — гаворыцца ў паведамленні (арфаграфія, пунктуацыя і асаблівасці стылю захаваныя).

Адзначаецца, што нелегальныя мігранты дастаўленыя ва ўстанову аховы здароўя, ім аказаная медыцынская дапамога.

Па факце “бесчалавечнага стаўлення да бежанцаў” Браслаўскім раённым аддзелам СК праводзіцца праверка.

“Цынічная абыякавасць з боку сумежных дзяржаў да жыцця і правоў бежанцаў спрыяе прадаўжэнню ксенафобскай палітыкі ў дачыненні да мігрантаў. Прыбалтыйскія краіны, з маўклівай згоды калектыўнага Захаду, ладзяць у беларускім памежжы генацыд паводле расавых і нацыянальных прыкмет”, — заявілі ў СК.

Беларускія ўлады рэгулярна паведамляюць пра пакуты, фізічныя траўмы і гібель замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі.

Не менш за 116 нелегальных мігрантаў, у тым ліку 15 жанчын, памерла на мяжы Беларусі з краінамі ЕС за тры гады — з вясны 2021-га па канец сакавіка 2024-га, вынікае з дакладу “Бяспечнага шляху няма. Смерці мігрант_ак на мяжы Еўрапейскага саюза і Беларусі” праваабарончай арганізацыі Human Constanta. Непасрэдна на тэрыторыі Беларусі на канец сакавіка 2024 года памерла не менш за 47 чалавек.

Пра напады на польскіх вайскоўцаў і памежнікаў нелегальных мігрантаў, якія спрабавалі трапіць у Еўрасаюз з беларускай тэрыторыі, публічна паведамлялася ў канцы траўня і пачатку чэрвеня.

6 чэрвеня стала вядома пра смерць вайскоўца 1-й танкавай брыгады Матэвуша Сітэка, параненага 28 траўня на мяжы з Беларуссю. Паводле інфармацыі Памежнай аховы Польшчы, Сітэк падвергнуўся нападу мігранта, які ў складзе вялікай групы спрабаваў незаконна перасекчы мяжу з боку Беларусі.

27 кастрычніка 2023 года, каментуючы патокі нелегальнай міграцыі з Беларусі ў краіны Еўрасаюза, Аляксандр Лукашэнка заявіў: “Мы не адстойнік, мы нікога тут лавіць не будзем. Тым больш вы (краіны Захаду. — “Позірк”.) іх паклікалі. Хай ідуць”.

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.