У расійскім інстытуце далучэнне Заходняй Беларусі да СССР лічаць “збіраннем рускіх земляў”
13 верасня, Позірк. Часткай “працэсу збірання рускіх земляў” назваў далучэнне да СССР Заходняй Беларусі і Украіны кіраўнік “працоўнай групы па супрацьдзеянні скажэнню гісторыі” Інстытута краін СНД (Масква) Ігар Шышкін 13 верасня на круглым стале, арганізаваным агенцтвам “Спутник Беларусь” (РИА Новости).
Ён заявіў аб “цывілізацыйным і глабальна-палітычным значэнні” 17 верасня 1939 года.
Прадстаўнік інстытута лічыць паход Чырвонай арміі “не толькі ўнутрыбеларускай і ўнутрыўкраінскай”, але і “агульнарасійскай і агульнарускай падзеяй”.
“Бо падзеі 17 верасня ні ў якай меры нельга разглядаць асобна ад ⟨…⟩ шматвяковага працэсу збірання рускіх земляў. Таго працэсу, які пачаўся яшчэ пры Іване Каліце (XIII–XIV стст. — “Позірк”.). І вось завяршыўся ён — як тады думалі, завяршыўся. На жаль, зараз мы ведаем, што не завяршыўся”, — сказаў Шышкін.
Паводле яго сцвярджэння, 85 гадоў таму “ўсе старажытнарускія землі, захопленыя тымі ці іншымі дзяржавамі ў працэсе стагоддзяў і якія знаходзіліся пад чужой акупацыяй, упершыню з часоў старажытнарускай дзяржавы зноў апынуліся ў адной дзяржаве, зноў усе галіны рускага народа аказаліся злучаныя ў адно цэлае і пазбаўлены ад іншароднай інарэлігійнай акупацыі”.
Значэнне гэтай падзеі “з пункту гледжання Расіі” прадстаўнік арганізацыі параўнаў з далучэннем левабярэжнай Украіны пры цару Аляксею Міхайлавічу (XVII ст., у яго выкладанні гэта “вызваленне”), раздзеламі Рэчы Паспалітай (XVIII ст., назваў “вызваленнем ад польскага ярма пры Кацярыне Вялікай”).
“Пры Сталіне”, сказаў ён, адбылося “ўз’яднанне вялікага рускага народа”.
Пры гэтым Шышкін упэўнены, што дзеянні савецкіх уладаў у 1939 годзе “прадвызначылі вынікі Другой сусветнай вайны”.
“Польшча на той момант была ворагам і з’яўляецца ворагам цяпер”, — заявіў ён.
Прадстаўнік інстытута ў Беларусі Мікалай Сяргееў сцвярджае, што святкаванне Дня народнага адзінства 17 верасня сутыкаецца “з утоеным супраціўленнем ⟨…⟩ глыбіннай Рэчы Паспалітай, якая сфарміравана ў Беларусі за апошнія 30 гадоў”.
Адным з яе прадстаўнікоў ён назваў праўладнага гісторыка і дэпутата Палаты прадстаўнікоў Ігара Марзалюка, які нібыта прапаноўваў Аляксандру Лукашэнку звязаць свята з іншымі датамі.
85 гадоў таму, лічыць Сяргееў, не адбылося ўз’яднання “рускіх земляў” “у цывілізацыйным плане”.
“Руская самасвядомасць у савецкі час, мякка кажучы, не віталася ў насельніцтва, асабліва Заходняй Беларусі і ва Украіне, – сказаў ён. — І ў выніку зараз вось вялікая праца мае быць для таго, каб менавіта і беларускае, і якое пакутуе ад гэтага рэжыму, які ў Кіеве, украінскае насельніцтва ў выніку ўсвядомілі сябе рускім людзьмі”.
Прадстаўнік інстытута заклікаў не толькі “правесці дэпаланізацыю”, але і “весці работу па аднаўленні рускай асновы нацыянальнай свядомасці Беларусі”.
Створаны ў 1996 годзе Інстытут дыяспары і інтэграцыі (Інстытут краін СНД) — расійскі аналітычны цэнтр, недзяржаўная арганізацыя, асноўнай мэтай якой афіцыйна названа “вывучэнне праблем блізкага замежжа і вызначэнне і навуковая падтрымка расійскіх інтарэсаў на тэрыторыі былога СССР”.
Заснаваны расійскімі дзяржорганамі і падтрымліваецца імі.
Сярод іншых, дзейнічаюць аддзяленні арганізацыі ў акупаваным РФ Крыме і Ціраспалі (Прыднястроўе).
Яго дзейнасць забаронена ва Украіне.
Дзень народнага адзінства — дзяржаўнае свята, якое адзначаецца 17 верасня. Заснаваны ўказам Лукашэнкі ў чэрвені 2021 года і прымеркаваны да гадавіны польскага паходу Чырвонай арміі, паводле вынікаў якога Заходняя Беларусь была далучана да БССР.
Паход быў узгоднены з нацысцкай Германіяй, якая атакавала Польшчу 1 верасня і распачала тым самым Другую сусветную вайну.
Устанаўленне свята раскрытыкавала афіцыйная Варшава і беларускія дэмсілы.
Беларускія ўлады напярэдадні даты праводзяць прапагандысцкую кампанію ў падкантрольных СМІ і дзяржарганізацыях.