Грузія дэпартавала ў сакавіку амаль сотню замежнікаў, у іх ліку былі беларусы
3 сакавіка, Позірк. Грузія дэпартавала ў сакавіку 97 замежных грамадзян, паведамляе прэс-служба Міністэрства ўнутраных спраў гэтай дзяржавы.
Дэпартаваныя з’яўляюцца грамадзянамі 18 краін: Індыі, Беларусі, Кітая, Таджыкістана, Азербайджана, Расіі, Бангладэш, ЗША, Ірака, Ірана, Нігерыі, Туркменістана, Турцыі, Егіпта, Пакістана, Камеруна, Іарданіі і Кыргызстана.
Падрабязную статыстыку па краінах МУС не прадставіла.
“Частка замежных грамадзян пакінула Грузію добраахвотна, а частка была прымусова выправаджаная з краіны ў выніку захадаў, прынятых Дэпартаментам міграцыі [МУС]. Высланым асобам у адпаведнасці з законам быў забаронены ўезд у краіну”, — гаворыцца ў паведамленні.
Дэпартамент міграцыі МУС Грузіі “з’яўляецца органам, адказным за барацьбу з нелегальнай міграцыяй унутры краіны”, адзначае ведамства. “Адна з яго кампетэнцый” — “выяўленне замежных грамадзян, якія знаходзяцца ў Грузіі без законных падстаў, і ажыццяўленне іх выправаджэння”, падкрэслілі ў МУС.
Грузія стала адной з краін, у якую эмігравала нямала беларусаў, ратуючыся ад распачатых пасля падзей 2020 года рэпрэсій. У краіне пражывае каля 12 тыс. беларускіх грамадзян. Іх колькасць паступова змяншаецца ў сувязі з працяглым палітычным крызісам і заканчэннем тэрміну дзеяння пашпартоў, якія пасля ўказа Аляксандра Лукашэнкі, выдадзенага ў верасні 2023 года, немагчыма абмяняць за мяжой.
Улады Грузіі адхіляюць усе заявы беларусаў пра наданне прытулку. Кіроўная партыя “Грузінская мара” прарасійскага алігарха Бідзіны (Барыса) Іванішвілі пайшла на канфрантацыю з Еўрасаюзам і ЗША, прызнае рэжым Лукашэнкі (абраны аднапартыйным парламентам прэзідэнт Міхеіл Кавелашвілі павіншаваў таго з “перавыбраннем”), яе метады барацьбы з апазіцыяй усё больш нагадваюць беларускія.
Тбіліскі гарсуд часткова задаволіў скаргу беларускага праваабаронцы Кісляка на адмову ў прытулку
26 сакавіка, Позірк. Тбіліскі гарадскі суд часткова задаволіў скаргу беларускага праваабаронцы Рамана Кісляка на адмову ў прытулку. "Як я зразумеў са слоў адваката, Дэпартамент міграцыі МУС павінен паўторна разгледзець маю справу“, — паведаміў “Позірку" Кісляк. Паводле яго слоў, суд меркавана …
