Шэсць банкаў абвясцілі аб новаўвядзеннях у працы з кліентамі

3 красавіка, Позірк. Шэсць банкаў, якія працуюць у Беларусі, паведамілі аб змене асобных правіл абслугоўвання і прадставілі новыя магчымасці для кліентаў, сведчыць праведзены “Позіркам” маніторынг іх актуальных прэс-рэлізаў.

“Альфа Банк у Беларусі” знізіў памер узнагароджання з 2 да 0,5 базавых велічынь (з 84 да 21 рубля) за заключэнне дадатковага пагаднення да крэдытнай дамовы аб змяненні плацежнага перыяду па ініцыятыве крэдытаатрымальніка.

“Беларусбанк” падоўжыў да 31 снежня акцыю “Трансфармацыя” для тых, хто пераводзіць свой бізнес з ІП у юрыдычную асобу. Акрамя гэтага, кліенты змогуць карыстацца пакетам паслуг “На100ящая поддержка” за 1 капейку ў месяц практычна паўгода: у месяц падключэння плюс наступныя пяць каляндарных месяцаў.

“Белгазпрамбанк” увёў узнагароджанне за арганізацыю эмісіі дэпазітарных аблігацый на ўнутраным рынку. Памер складзе 0,1% ад аб’ёму зарэгістраванага выпуску (мінімум 3 тыс. рублёў, максімум — 5 тыс.).

“Белінвестбанк” увёў камісію, якая спаганяецца з самазанятых за эквайрынг аперацый з карткамі міжнародных плацежных сістэм і плацежнай сістэмы “Белкарт”: па картках “Белінвестбанк” — 1,1%; па картках банкаў-рэзідэнтаў — 2,3%; па картках банкаў-нерэзідэнтаў — 2,5%.

“Парытэтбанк” з 7 красавіка прадаставіць магчымасць афармляць зарплатныя карты ў рэжыме онлайн па адным з трох пакетаў прадукту “Зарплатны праект 2.0” (“Базавы”, “Стандартны”, “Прэміум”). Замовіць карты можна ў мабільным дадатку iParitet.

“Сбер Банк (Беларусь)” прадастаўляе магчымасць ажыццяўляць плацяжы ў расійскіх рублях на карысць рэзідэнтаў Лаоса. Узнагароджанне па такіх пераводах складзе 3% ад сумы (мінімум 15 тыс. расійскіх рублёў).

На 1 сакавіка 2025 года ў краіне быў зарэгістраваны 21 банк. Іх прыбытак на 1 сакавіка 2025 года склаў 597,4 млн рублёў — у 2,6 раза больш, чым месяцам раней (227 млн).

Нарматыўны капітал на ўказаную дату склаў 23 млрд 266,4 млн (+1,6% за месяц), актывы, схільныя да крэдытнай рызыкі, — 113 млрд 852,4 млн (+0,8%). Неабслугоўваных актываў стала менш — 2 млрд 974,3 млн (-7,5%). Велічыня пакрыцця ліквіднасці павялічылася на 49% (+7,1 п.п.), чыстага стабільнага фандавання — на 31,6% (+0,4 п.п.).