Лукашэнка падпісаў указ аб стварэнні Апеляцыйнага эканамічнага суда

3 красавіка, Позірк. Указ аб стварэнні Апеляцыйнага эканамічнага суда падпісаў 3 красавіка Аляксандр Лукашэнка, паведамляе яго прэс-служба.

Адзначаецца, што рашэнне прынятае ў мэтах “рэалізацыі палажэнняў Кодэкса грамадзянскага судаводства, якім прадугледжваецца стварэнне трохзвённай сістэмы эканамічных судоў”.

“Такое структурнае пераўтварэнне адбудзецца за кошт падзелу дзейнасці судоў першай і апеляцыйнай інстанцый, якія цяпер функцыянуюць у рамках аднаго суда. Гэта будзе з’яўляцца важным крокам у напрамку павышэння эфектыўнасці адпраўлення правасуддзя па эканамічных справах”, — гаворыцца ў паведамленні.

Новая інстанцыя пачне працу з 1 студзеня 2026 года, гэта значыць з даты ўступлення ў сілу Кодэкса грамадзянскага судаводства.

Суд плануецца сфарміраваць за кошт наяўнай колькасці суддзяў і работнікаў апаратаў іншых судоў. Усяго ў ім будуць працаваць 27 суддзяў, уключаючы старшыню і яго намеснікаў.

Вярхоўнаму суду даручана ўнесці прапановы па кандыдатурах на кіруючыя і судзейскія пасады, а таксама вырашыць усе неабходныя арганізацыйныя пытанні, накіраваныя на забеспячэнне дзейнасці новага судовага органа.

У 2022 годзе стварэнне Апеляцыйнага эканамічнага суда анансаваў першы намеснік старшыні Вярхоўнага суда Валерый Калінковіч.

Паводле яго слоў, большасць грамадзянскіх спраў разглядаецца раённымі судамі, а апеляцыйная інстанцыя сфарміравана на ўзроўні абласных і Мінскага гарадскога суда. Што тычыцца эканамічных спраў, сказаў Калінковіч, то “па першай інстанцыі іх разглядае эканамічны суд вобласці і ў рамках гэтага ж суда спецыяльна прызначаныя суддзі выконваюць ролю апеляцыйнай інстанцыі”. “Гэта значыць міжнародны прынцып пабудовы правасуддзя “адзін суд — адна інстанцыя” ў сістэме гаспадарчых судоў на сёння не вытрыманы”, — дадаў ён.

Раней паведамлялася, што будынак суда будуецца ў Мінску на вул. Мяснікова, 5. ДзяржСМІ адзначалі, што да 1 лістапада 2025 года павінен атрымацца чатырохпавярховы сучасны будынак. На трох паверхах — восем залаў судовых пасяджэнняў. На чацвёртым паверсе размесціцца Дэпартамент па архівах і справаводству.