Латушка: 90% сённяшніх чыноўнікаў змогуць застацца ў дзяржаўным апараце новай Беларусі
15 верасня, Позірк. У новы дзяржаўны апарат не павінны патрапіць толькі чыноўнікі з вышэйшага кадравага рэзерву Александра Лукашэнкі і толькі ў тым выпадку, калі яны здзейснілі злачынствы. Такое меркаванне выказаў былы міністр культуры, намеснік кіраўніцы Аб’яднага пераходнага кабінета (АПК) Павел Латушка на дыскусіі “Як стварыць у дэмакратычнай Беларусі сучасны нацыяльна-арыентаваны дзяржапарат, судовую сістэму і сілавыя ведамствы?”, якая адбылася ў рамках “Стратэгічнай Анты-Канферэнцыі “Belarusian ID Revival Days” (“Дні адраджэння беларускай ідэнтычнасці”) 15 верасня ў Варшаве.
“Павінны ісці суды, і суды будуць вырашаць”, — сказаў ён.
Думку пра будучыню чыноўнікаў Латушка выказаў, адказваючы на пытанне мадэратара дыскусіі. Зміцер Міцкевіч адзначыў, што не даверыў бы некаторым з іх “агарод ускапаць”, і запытаўся: “Які адсотак з гэтага дзяржаўнага апарата можа быць уключаны ў апарат новай Беларусі?”
“90% павінны працаваць”, — лічыць Латушка.
