Рыжанкоў прыняў у новага амбасадара Кітая копіі даверчых грамат

17 верасня, Позірк. Новы амбасадар Кітая ў Беларусі Чжань Вэньчуань 17 верасня ўручыў копіі даверчых грамат міністру замежных спраў Максіму Рыжакову, паведаміла прэс-служба МЗС.

Паводле інфармацыі ведамства, бакі “абмяняліся думкамі пра стан і перспектывы развіцця беларуска-кітайскага супрацоўніцтва, падкрэсліўшы яго ўзровень і адзначыўшы інтэнсіўнасць кантактаў паміж лідарамі дзвюх краін, дзяржаўнымі органамі, дзелавой і навуковай супольнасцю, іншымі ўдзельнікамі двухбаковага ўзаемадзеяння”.

“Была адзначаная актыўная роля Беларусі ў рэалізацыі кітайскай ініцыятывы “Пояс і Шлях”, а таксама ў прасоўванні ініцыятыў у галіне глабальнага развіцця, глабальнай бяспекі і глабальнай цывілізацыі”, — гаворыцца ў паведамленні.

Паводле інфармацыі МЗС, Рыжанкоў пажадаў амбасадару “поспехаў у дыпламатычнай працы і павіншаваў кітайскіх калег са Святам сярэдзіны восені”. У сваю чаргу кітайскі дыпламат “павіншаваў Беларусь з Днём народнага адзінства”.

Як паведаміла амбасада Кітая, Рыжанкоў на сустрэчы адзначыў, што “дзякуючы стратэгічнаму кіраўніцтву кіраўнікоў дзвюх дзяржаў беларуска-кітайскія адносіны ўсепагоднага і ўсебаковага стратэгічнага партнёрства развіваюцца ў здаровым і стабільным ключы”.

“Абмены на вышэйшым і высокім узроўнях паміж дзвюма краінамі становяцца ўсё больш цеснымі, палітычны ўзаемадавер пастаянна паглыбляецца, абедзве краіны цвёрда падтрымліваюць адзін аднаго ў пытаннях, якія тычацца карэнных інтарэсаў дзвюх краін, а прагматычнае супрацоўніцтва дасягнула плённых вынікаў. Беларускі бок надае вялікае значэнне адносінам з Кітаем і будзе аказваць цвёрдую падтрымку і выгоды амбасадару Чжаню ў выкананні абавязкаў”, — гаворыцца ў рэлізе кітайскага знешнепалітычнага ведамства.

Паводле слоў Чжань Вэньчуаня, “пад асабістым клопатам і прасоўваннем кіраўнікоў дзвюх дзяржаў кітайска-беларускія адносіны “захоўваюць добрую дынаміку развіцця і маюць шырокія перспектывы”.

Сцвярджаецца, што новы амбасадар КНР “будзе добрасумленна выконваць свае абавязкі і прыкладаць сумесныя намаганні з беларускім бокам для рэалізацыі ўсіх важных дамоўленасцяў, дасягнутых кіраўнікамі дзвюх дзяржаў, каб кітайска-беларускія абмены і супрацоўніцтва ў розных галінах бесперапынна дасягнулі новых вынікаў”.

На сайце амбасады КНР паведамляецца, што Чжань Вэньчуань нарадзіўся ў жніўні 1976 года, па нацыянальнасці хань, член Камуністычнай партыі Кітая, магістр права.

Паводле даступнай у глабальнай сетцы інфармацыі, дыпламат раней быў намеснікам амбасадара Кітая ва Узбекістане, на дыпламатычнай працы з 1999 года, скончыў Пекінскі інстытут замежных моў, спецыяліст па Цэнтральнай Азіі. Займаў пасаду намесніка дырэктара дэпартамента па кіраванні замежнымі справамі МЗС Кітая.

Беларусь “з самага пачатку, адразу і без усялякіх сумневаў” далучылася да ініцыятывы “Пояс і Шлях”, стаўшы “першай еўрапейскай краінай, якая зрабіла гэта”, заявіў на саміце ініцыятывы 12 верасня ў Ганконгу Максім Рыжанкоў.

На яго думку, гэтае “дальнабачнае рашэнне” Аляксандра Лукашэнкі “будуць з удзячнасцю памятаць будучыя пакаленні беларусаў”.

Пра пачатак “сур’ёзнага супрацоўніцтва” Беларусі з кітайскімі рэгіёнамі паведаміў Лукашэнка 5 верасня ў Мінску на сустрэчы з амбасадарам КНР Се Сяаюнам з нагоды завяршэння ім дыпламатычнай місіі.

22-23 жніўня Беларусь наведваў кіраўнік кітайскага ўрада Лі Цян.

Летась Лукашэнка двойчы ездзіў у Кітай і сустракаўся з яго кіраўніком Сі Цзіньпінам. Першы візіт адбыўся 28 лютага — 2 сакавіка, другі — 3-4 снежня. Абодва разы, як паведамлялася, абмяркоўваўся шырокі спектр пытанняў, у тым ліку звязаных з эканомікай, міжнароднымі адносінамі.