Рыжанкоў: Палітыка Трампа спрыяе таму, каб Амерыка ўспрымалася ў свеце як адказны партнёр

11 сакавіка, Позірк. Прэзідэнт ЗША Дональд Трамп і яго адміністрацыя вядуць “вельмі ўзважаную палітыку”, “вельмі прагматычную, выбудаваную ў інтарэсах амерыканскага народа перш за ўсё”, заявіў 11 сакавіка міністр замежных спраў Беларусі Максім Рыжанкоў.

Гэтая палітыка, паводле яго слоў, “натуральна, спрыяе таму, каб Амерыка ўспрымалася як адказны партнёр у свеце”.

“Яны цяпер так і працуюць, — сказаў Рыжанкоў у каментары дзяржаўнаму тэлеканалу “Першы інфармацыйны”. — Не авантурысты, якія развязваюць войны, падтрымліваюць нейкую нестабільнасць, а тыя, хто сваім досведам і аўтарытэтам спрыяе завяршэнню нейкіх канфліктаў і вырашэнню нейкіх лёсавызначальных рэчаў”.

“Вы бачыце, усе ініцыятывы Трампа накіраваныя на вельмі пазітыўныя рэчы”, — дадаў кіраўнік МЗС.

У інтэрв’ю амерыканскаму блогеру Марыё Науфалу, апублікаванаму 5 сакавіка, Аляксандр Лукашэнка прапанаваў правесці ў Мінску перамовы прэзідэнта Расіі Уладзіміра Пуціна, Трампа і ўкраінскага прэзідэнта Уладзіміра Зяленскага па пытанні завяршэння вайны ва Украіне.

“Хочаце — прыязджайце… Вось тут сядзем спакойна, без шуму, без крыкаў, дамовімся. Таму перадайце Трампу — я яго чакаю тут разам з Пуціным і Зяленскім. Сядзем і спакойна дамовімся. Калі вы хочаце дамовіцца”, — сказаў Лукашэнка, відавочна даючы зразумець, што таксама хоча прыняць удзел у такіх перамовах.

Інтэрв’ю было запісана 27 лютага, за дзень да скандальнай сустрэчы Дональда Трампа і Уладзіміра Зяленскага ў Вашынгтоне. Сварка паміж Зяленскім з аднаго боку, а таксама Трампам і віцэ-прэзідэнтам ЗША Джэй Дзі Вэнсам з другога перад запланаваным падпісаннем дамовы аб сумесным выкарыстанні ўкраінскіх рэдказямельных металаў стала сусветнай навіной увечары 28 лютага. Бакі рэзка паспрачаліся наконт вайны РФ супраць Украіны. Новая амерыканская адміністрацыя адкрыта сімпатызуе краіне-агрэсару. Зяленскі датэрмінова завяршыў візіт у ЗША, пагадненне не было падпісана.

11 сакавіка ў Саудаўскай Аравіі пачаўся новы раўнд перамоў паміж Кіевам і Вашынгтонам, у цэнтры ўвагі — мірнае ўрэгуляванне ва Украіне. Зяленскі і Трамп у перамовах не ўдзельнічаюць.

Афіцыйны Мінск з самага пачатку расійскай агрэсіі супраць Украіны 24 лютага 2022 года адкрыта падтрымлівае Маскву.

Папярэдняя адміністрацыя ЗША на чале з прэзідэнтам Джо Байдэнам падтрымлівала Украіну ў вайне, аказваючы Кіеву вайсковую, фінансавую і іншую дапамогу.