Міліцыя перакрыла канал пастаўкі марыхуаны, вынята агулам 7,5 кг наркотыку

15 чэрвеня, Позірк. Двух жыхароў Гомеля (42 і 45 гадоў), раней судзімых за незаконны абарот наркотыкаў, затрымалі з доказамі злачынства аператыўнікі абласнога наркакантролю пры падтрымцы АМАП, паведаміла 15 чэрвеня прэс-служба Міністэрства ўнутраных спраў.

Паводле сцвярджэння ведамства, мужчыны арганізавалі дзве інтэрнэт-крамы, прызначаныя для распаўсюду наркотыкаў на тэрыторыі Гомельскага і Мінскага раёнаў.

Адзначаецца, што ў тайніках і падвальным памяшканні знойдзена і вынята “1,5 кг небяспечнага наркатычнага сродку марыхуана”, а таксама “наўтбукі, планшэты, мабільныя тэлефоны, грашовыя сродкі, упаковачныя матэрыялы ды шалі”.

“Падчас правядзення далейшых аператыўна-вышуковых мерапрыемстваў выяўлены канал пастаўкі марыхуаны ў наркамаркет суседняй дзяржавы, які арганізавалі 54 і 56-гадовы гамяльчане. Па месцы іх жыхарства знойдзена і вынята 6 кг рэчыва”, — паведаміла МУС, не канкрэтызаваўшы, ці затрыманы гэтыя людзі.

Распачатыя тры крымінальныя справы. Фігурантам пагражае да 15 гадоў пазбаўлення волі.