У аэрапорце Ерэвана затрыманы актывіст Віктар Клімус — праваабаронцы

15 чэрвеня, Позірк. У аэрапорце Ерэвана затрыманы беларускі актывіст Віктар Клімус, паведаміў 15 чэрвеня праваабарончы цэнтр “Вясна”.

Паводле інфармацыі праваабаронцаў, мужчына прыбыў у Арменію з Польшчы “з працоўным візітам”.

“Армянскія памежнікі паведамілі, што яго імя ўнесенае ў міжнародную базу вышуку”, — адзначыла “Вясна”.

Паведамляецца, што беларускія і армянскія праваабаронцы, а таксама дарадца дэмакратычнага лідара Святланы Ціханоўскай Леанід Марозаў “працуюць над вызваленнем” Клімуса.

Актывіст Віктар Клімус узначальваў культурны цэнтр “Грунтоўня”, што працаваў у Брэсце. Напрыканцы 2020 года ў яго кватэры быў зладжаны вобшук. Мужчына заяўляў, што знаходзіцца ў вышуку ў рамках крымінальнай справы (маштабная палітычная “справа карагодаў”). Пакінуў Беларусь на пачатку 2021 года.