Адмыслоўцы з Беларусі і РФ абменьваюцца досведам у сферы вайсковай медыцыны
26 верасня, Позірк. Другая рэспубліканская навукова-метадычная канферэнцыя “Вайсковая медыцына. Гісторыя і сучаснасць” праходзіць у Віцебскім дзяржаўным медыцынскім універсітэце, паведаміла 26 верасня прэс-служба Міністэрства аховы здароўя.
У форуме бяруць удзел прадстаўнікі беларускіх медуніверсітэтаў, а таксама адмыслоўцы з Растова-на-Доне (РФ).
Канферэнцыя заклікана “абагуліць досвед метадаў падрыхтоўкі” вайсковых урачоў і ўрачоў — спецыялістаў медыцыны катастроф у надзвычайных сітуацыях. Адмыслоўцы абмяняюцца “практычным досведам і дасягненнямі вайскова-медыцынскай навукі”.
Запланаваныя секцыі па вайскова-палявой хірургіі; гістарычным, метадычным і педагагічным аспектам вайсковай медыцыны; майстар-класы па атрыманні антысептычных і сродкаў дэзінфекцыі ў палявых умовах і дэзінфекцыі памяшканняў аэразольным метадам, па аказанні першай дапамогі ў небяспечных умовах.
23 верасня міністр аховы здароўя Беларусі Аляксандр Хаджаеў і яго расійскі калега Міхаіл Мурашка падпісалі мемарандум аб супрацы ў галіне медыцыны катастроф.
У рамках пагаднення, паводле звестак Мінздароўя, бакі маюць намер абменьвацца досведам і інфармацыяй пра навукова-тэхнічныя дасягненні ў галіне медыцыны катастроф і ліквідацыі медыка-санітарных наступстваў надзвычайных сітуацый (НС). Акрамя таго, яны збіраюцца праводзіць сумесныя адукацыйныя і навукова-практычныя мерапрыемствы, скіраваныя на падвышэнне ўзроўню падрыхтоўкі медработнікаў: навучальныя курсы, семінары ды інш.
Плануюцца сумесныя вучэнні і трэніроўкі па “ліквідацыі медыка-санітарных наступстваў надзвычайных сітуацый”.
Беларуска-расійскае супрацоўніцтва ў галіне вайсковай медыцыны развіваецца на фоне поўнамаштабнай вайны, якую Расія вядзе супраць Украіны. Афіцыйны Мінск падтрымлівае агрэсію Крамля.
Беларускія ўлады надалі арміі РФ тэрыторыю для нападу на суседнюю краіну ўзімку і ўвесну 2022 года, а затым на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў.