У Лодзі здзейснены напад на 48-гадовую беларуску, паліцыя шукае падазраванага

17 верасня, Позірк. Пра напад у Лодзі (Польшча) на 48-гадовую грамадзянку Беларусі паведамляе партал wiadomosci.wp.pl.

Інцыдэнт здарыўся ўвечары 14 верасня на вуліцы Капцыньскага, калі жанчына ўваходзіла ў пад’езд жылога дома.

Паведамляецца, што “пацярпелай удалося абараніцца, а нападнік уцёк”.

Пра злачынства ў праваахоўныя органы паведаміў сведка. Беларуска таксама звярнулася ў паліцыю.

Узбуджаная крымінальная справа паводле артыкула аб парушэнні недатыкальнасці асобы.

Адзначаецца, што паліцэйскія канфіскавалі запісы з вулічных камер назірання і грамадскага транспарту, якім карысталася ў той вечар беларуская грамадзянка.

Паводле слоў прадстаўніка мясцовай паліцыі Камілы Савіньскай, пакуль няма дастатковых падстаў лічыць, што матывам нападу былі “рабаванне, сексуальны гвалт ці нацыянальныя забабоны”.

“Супрацоўнікі паліцыі заклікаюць асоб, якія могуць дапамагчы ўстанавіць асобу нападніка або былі сведкамі інцыдэнту, звязацца з паліцэйскім участкам”, — гаворыцца ў публікацыі.

На відэазапісы, апублікаваным тэлеграм-каналам “Лодзь Интересно”, бачна, як невядомы нападае на жанчыну ззаду і спрабуе яе душыць. Гэта працягваецца некалькі секунд, пасля чаго нападнік ўцякае.

Мяркуючы па кадрах, беларуска не атрымала сур’ёзных фізічных траўмаў.