Латвія да 8 кастрычніка забараніла палёты ў цёмны час сутак у памежжы з Беларуссю і Расіяй

17 верасня, Позірк. З 18 верасня да 8 кастрычніка паветраная прастора ля межаў з Беларуссю і Расіяй будзе закрытая ў цёмны час дня, паведамляе Міністэрства абароны Латвіі.

Забарона будзе дзейнічаць з 20 да 7 гадзін.

На думку вайсковага ведамства, абмежаванні даюць Нацыянальным узброеным сілам магчымасць “паўнавартасна кантраляваць забароненую зону паветранай прасторы, інтэнсіфікаваць выпрабаванні акустычных сістэм назірання, праводзіць вучэнні з дронамі і супрацьдронавымі сродкамі, разгортваць і навучаць мабільныя баявыя падраздзяленні“.

Пасля ацэнкі рызык уладамі было прынята рашэнне працягнуць абмежаванні толькі ў цёмны час сутак, “калі пагроза з’яўляецца найбольшай“.

11 верасня напярэдадні беларуска-расійскіх вайсковых вучэнняў “Захад-2025“ Латвія закрыла на тыдзень сваю паветраную прастору ля ўсходніх межаў. Забарона тычылася лятальных апаратаў, якія падымаліся на вышыню да 6 тыс. метраў. Пасля ацэнкі рызык прынята рашэнне падоўжыць абмежаванні толькі ў цёмны час сутак, “калі пагроза з’яўляецца найбольшай“.

Падставай для такіх захадаў паслужылі падзеі 10 верасня, калі ў Польшчу масава ўварваліся расійскія дроны — упершыню за тры з паловай гады поўнамаштабнай агрэсіі РФ супраць Украіны. Частка дронаў прыляцела ў Польшчу праз Брэсцкую вобласць. Варшава заявіла пра “акт агрэсіі”. Для нейтралізацыі БПЛА задзейнічаліся сілы як Польшчы, так і іншых краін НАТО.

Прэм’ер-міністр Польшчы Дональд Туск паведаміў пра 19 парушэнняў паветранай прасторы. Міністэрства ўнутраных спраў і адміністрацыі пазней заявіла аб выяўленні сямі БПЛА і “абломкаў адной ракеты невядомага паходжання”, большая частка знойдзеная ў Люблінскім ваяводстве.

З 2 верасня па 8 кастрычніка ў Латвіі праходзяць комплексныя вучэнні па нацыянальнай абароне “Namejs 2025”.