Беларускія лыжнікі не будуць удзельнічаць у Кубку свету — санкцыі пакінутыя ў сіле
27 верасня, Позірк. Беларускія і расійскія лыжнікі не будуць дапушчаныя да Кубка свету ў новым сезоне, адпаведнае рашэнне прынятае 27 верасня на пасяджэнні Міжнароднай федэрацыі лыжнага спорту і сноўборду (FIS).
“Ніякага абмеркавання або чагосьці падобнага не было. Нас проста праінфармавалі, што ў надыходзячым сезоне ніякіх зменаў [у пытанні санкцый] не будзе”, — паведаміў выданню Expressen прадстаўнік лыжнай федэрацыі Швецыі Ларс Оберг.
Паводле яго слоў, захаванне санкцыя з’яўляецца пазітыўнай навіной. “Паколькі мы адчулі, што вецер дзьме ў іншым кірунку, гэта вельмі прыемна”, — сказаў ён.
“Швецыя належыць да той часткі FIS, якая лічыць, што адхіленне [расіян і беларусаў] павінна дзейнічаць датуль, пакуль ва Украіне сітуацыя не зменіцца. У цяперашняй сітуацыі мне здаецца няправільным дапускаць іх [да спаборніцтваў]”, — падкрэсліў Оберг.
Па эгідай FIS праводзяцца спаборніцтвы па лыжных гонках, горных лыжах, фрыстайле і сноўбордзе.
28 лютага 2022 года, праз некалькі дзён пасля пачатку вайны ва Украіне, Міжнародны алімпійскі камітэт заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынятая да выканання, у выніку чаго расейскі і беларускі спорт апынуўся амаль у поўнай ізаляцыі.
25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартоўцу нельга забараняць удзельнічаць у спаборніцтвах “толькі праз ягоны пашпарт”.
28 сакавіка МАК выпусціў заяву, у якой рэкамендаваў міжнародным федэрацыям у тыпах спорту дазволіць беларусам і расіянам удзельнічаць у міжнародных спаборніцтвах. Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзейных кантрактаў з сілавымі і ваеннымі ведамствамі сваіх краін.
З аналагічнымі ўмовамі МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях-2024 у нейтральным статусе.