Мінюст хоча ліквідаваць аб’яднанне выпускнікоў БДЭУ

29 верасня, Позірк. Мінскі гарадскі суд разгледзіць 8 кастрычніка пазоў Міністэрства юстыцыі аб ліквідацыі грамадскага аб’яднання “Клуб выпускнікоў Беларускага дзяржаўнага эканамічнага ўніверсітэта”, вынікае з раскладу пасяджэнняў на партале электроннага судаводства.

Арганізацыя заснаваная ў 2007 годзе. На яе сайце паведамляецца, што клуб з’яўляецца “грамадскім фарміраваннем грамадзян, створаным па ініцыятыве выпускнікоў БДЭУ, якія аб’ядналіся для рэалізацыі грамадзянскіх, сацыяльных і культурных правоў, а таксама для абароны агульных інтарэсаў”.

Старонка клуба ў “Фэйсбуку” не абнаўляецца з 2020 года. Акаўнт у “Інстаграме” недаступны.

Старшынёй праўлення клуба на яго сайце пазначаны Уладзімір Беразоўскі — дэкан Улікова-эканамічнага факультэта БДЭУ. Намеснік старшыні — выкладчык універсітэта Віктар Саевіч.

Саевіч рэгулярна выступае з праўладных пазіцый у дзяржаўных СМІ.

Паводле даных праваабарончай арганізацыі Lawtrend, за перыяд пасля прэзідэнцкіх выбараў 2020 года і да канца жніўня 2024-га ў Беларусі ліквідавана не менш за 1.777 некамерцыйных арганізацый (НКА) — аб’яднанняў, прафсаюзаў, фондаў, недзяржаўных устаноў і асацыяцый.