ЕС адклаў увядзенне новых правілаў уезду ў Шэнгенскую зону — штампы ў пашпарце працягнуць ставіць

11 кастрычніка, Позірк. Еўракамісія адклала ўвядзенне новай сістэмы ўезду і выезду (EES) у краіны Шэнгенскай зоны, паведамляе Euronews.com.

Новыя правілы павінны былі ўступіць у сілу 10 лістапада.

“Ясна, што гэта не пачне працаваць 10 лістапада”, — сказала камісар па ўнутраных справах Еўракамісіі Ілва Юхансан, удакладніўшы прычыну: тры краіны — члены ЕС пакуль не гатовыя да ўвядзення новай сістэмы.

Раней паведамлялася, што гаворка ідзе пра Германію, Францыю і Нідэрланды.

Entry Exit System ўяўляе сабой аўтаматызаваную сістэму рэгістрацыі грамадзян трэціх краін, якія прыбываюць у Шэнгенскую зону з кароткатэрміновымі візітамі. Мяркуецца, што з укараненнем EES на мяжы больш не будуць ставіць штампы ў пашпарты.

Калі сістэму ўвядуць, пры кожным перасячэнні знешняй мяжы Шэнгенскай зоны падарожніку трэба будзе сканаваць пашпарт у спецыяльным электронным тэрмінале самаабслугоўвання. Акрамя пашпарта, тэрмінал будзе сканаваць твар чалавека і адбіткі пальцаў. Даныя турыста павінны захоўвацца ў сістэме на працягу трох гадоў з даты апошняй паездкі.

Чакаецца, што сістэма будзе працаваць ва ўсіх краінах ЕС (акрамя Кіпра і Ірландыі), а таксама ў Ісландыі, Ліхтэнштэйне, Нарвегіі і Швейцарыі, якія падпісалі Шэнгенскае пагадненне.

Консульскі збор за разгляд візавага хадайніцтва для беларускіх грамадзян краінамі — членамі Шэнгенскага пагаднення складае сёння 35 еўра. Разам з тым візы ў краіны ЕС у Беларусі атрымаць вельмі складана. Тое ж тычыцца беларусаў-палітэмігрантаў, якія пражываюць у краінах, што не ўваходзяць у Шэнгенскую зону. Беларусы адчуваюць складанасці з запісам на падачу, консульствы не могуць працаваць аператыўна праз скарочаны штат супрацоўнікаў. Грамадзяне Беларусі часта выкарыстоўваюць паслугі пасрэднікаў або купляюць туры ў любую еўрапейскую краіну, каб атрымаць шэнгенскую візу і мець магчымасць выязджаць з краіны.