Затрыманыя яшчэ тры менеджары Беларускай чыгункі — СЧБ

14 кастрычніка, Позірк. Аб затрыманні трох менеджараў службы перавозак Беларускай чыгункі (БЧ) паведаміў 14 кастрычніка тэлеграм-канал нефармальнай “Супольнасці чыгуначнікаў Беларусі” (СЧБ).

Паводле звестак супольнасці, затрыманні праведзеныя 11 і 12 кастрычніка.

Пад варту ўзятыя начальнік службы перавозак БЧ Віталь Панюшэнка; яго намеснік — начальнік Цэнтра ўпраўлення перавозкамі (ЦУП) Фёдар Шулянкоў; першы намеснік начальніка ЦУП — кіраўнік аператыўна-распарадчага аддзела Аляксандр Іваноў.

Паводле папярэдняй інфармацыі, у дачыненні да іх распачатая крымінальная справа паводле арт. 430 КК (атрыманне хабару).

15 жніўня стала вядома, што намеснік начальніка БЧ Сяргей Сізін звольнены за парушэнне пісьмовага абавязацельства, прадугледжанага заканадаўствам аб барацьбе з карупцыяй.

13 чэрвеня прэс-служба МУС паведаміла аб выкрыцці супрацоўнікамі ГУБАЗіК карупцыйнай схемы, якую “стварыў і курыраваў адзін з кіраўнікоў БЧ”. Сцвярджалася, што падчас ператрусаў у загарадным доме аднаго з фігурантаў было знойдзена больш за 3 млн долараў.

Следчым камітэтам адкрыта крымінальная вытворчасць паводле ч. 3 арт. 430 КК (атрыманне хабару ў асабліва буйным памеры).

3 чэрвеня “Супольнасць чыгуначнікаў Беларусі” са спасылкай на свае крыніцы паведамляла пра затрыманне за карупцыю першага намесніка начальніка БЧ Пятра Дулуба, а ў канцы ліпеня — Сізіна і галоўнага інжынера БЧ Сяргея Навадворскага.

14 чэрвеня на нарадзе з урадам Аляксандр Лукашэнка пацвердзіў, што за карупцыйныя злачынствы пад следствам знаходзіцца сярод іншых Дулуб, які таксама быў зняты з пасады пастановай урада.

12 жніўня Лукашэнка прызначыў Валерыя Вярэніча начальнікам БЧ. На гэтую пасаду ён пераведзены з пасады намесніка міністра транспарту і камунікацый. Прычыны звальнення папярэдняга кіраўніка Уладзіміра Марозава не названыя.