Вялікабрытанія пакуль не стала накіроўваць у Беларусь новага амбасадара

16 кастрычніка, Позірк. Амбасаду Вялікабрытаніі ў Беларусі ўзначаліў в.а. часовага паверанага Дэвід Уорд (David Ward), вынікае з інфармацыі, размешчанай на сайце брытанскага знешнепалітычнага ведамства.

У Мінск дыпламат прыбыў у верасні, аднак аб яго назначэнні на пасаду публічна аб’яўлена толькі 16 кастрычніка — у акаўнтах дыпмісіі ў сацсетках.

Да прыбыцця ў Беларусь Уорд з’яўляўся кіраўніком аддзела гуманітарнай палітыкі і ўзаемадзеяння, мэтавай групы брытанскага знешнепалітычнага ведамства ў Ізраілі/сектары Газа.

На дыпламатычнай службе з 1992 года, працаваў у Японіі, Непале, Кітаі, Лівіі, Грэцыі, Афганістане, Эрытрэі, на Саламонавых Выспах і Самоа.

Сярод яго замежных моў французская, нямецкая, японская, мандарынская (дыялект кітайскай) і непальская.

Такім чынам, афіцыйны Лондан пакуль панізіў узровень сваёй дыпламатычнай прысутнасці: дагэтуль у Мінску працавала амбасадар, Жаклін Перкінс. Аб завяршэнні яе місіі стала вядома сёлета ў жніўні.