Шэраг беларускіх палітычных структур заклікаў не рызыкаваць жыццём падчас выбараў-2025

28 кастрычніка, Позірк. Шэраг беларускіх палітычных структур заклікаў суайчыннікаў не рызыкаваць жыццём падчас запланаваных рэжымам Аляксандра Лукашэнкі на наступны год прэзідэнцкіх выбараў.

“У сувязі з прызначанымі на 26 студзеня 2025 года электаральнымі мерапрыемствамі, удзельнікі Мемарандума: партыя Народная Грамада, партыя Беларуская Хрысціянская Дэмакратыя і аргкамітэт партыі Краіна Для Жыцця звяртаюцца з сумеснай Заявай, — гаворыцца ў паведамленні ў тэлеграм-канале “Народнай Грамады” (захаваны аўтарскі стыль; аніводная з пералічаных структур не зарэгістраваная ў Беларусі). — Мы не прымаем удзел у фарсе! Няма гучных лозунгаў для краіны, якая пагрузілася ў цемру. Наш заклік — Жывіце. Кожны дзень, кожную хвіліну, бо гэта галоўная каштоўнасць. Няма ніякіх “дат”. Перамагае Праўда і Вера дадзеныя Богам. Не рызыкуйце самым каштоўным”.

23 кастрычніка Палата прадстаўнікоў прызначыла прэзідэнцкія выбары на 26 студзеня 2025 года. У той жа дзень Лукашэнка заявіў у інтэрв’ю расійскай прапагандыстцы, карэспандэнту тэлеканала “Россия 1” Вользе Скабеевай, што мае намер “балатавацца на новы тэрмін”.

Пра планы вылучыць сваю кандыдатуру таксама заявіў старшыня праўладнай Ліберальна-дэмакратычнай партыі Алег Гайдукевіч.

Старшыня ліквідаванага ўладамі “Руху “За Свабоду” Юрый Губарэвіч, які жыве за мяжой, накіраваў у Цэнтрвыбаркам заяву, спіс ініцыятыўнай групы і іншыя дакументы, “неабходныя для рэгістрацыі ў якасці кандыдата на выбарах прэзідэнта Рэспублікі Беларусь”.

Дэмсілы ў сумеснай заяве, прымеркаванай да прызначэння даты прэзідэнцкіх выбараў, заклікалі суайчыннікаў галасаваць на іх “супраць усіх”. Сцвярджаецца, што галасаванне “супраць усіх” пакажа, што “беларускае грамадства па-ранейшаму супраць Лукашэнкі і патрабуе свабодных і сумленных выбараў”.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.