Галоўчанка і віцэ-прэм’ер РФ Мантураў абмеркавалі пашырэнне супрацоўніцтва ў сферы авіябудавання

28 кастрычніка, Позірк. “Ход рэалізацыі імпартазамяшчальных праектаў”, а таксама “пашырэнне супрацоўніцтва ў сферы грамадзянскага авіябудавання” абмеркавалі на сустрэчы 28 кастрычніка ў Мінску прэм’ер-міністр Раман Галоўчанка і першы віцэ-прэм’ер РФ Дзяніс Мантураў.

Як паведамляе прэс-служба ўрада Беларусі, бакі дамовіліся аб далейшых “сумесных дзеяннях па паглыбленні лакалізацыі складанатэхнічнай прадукцыі, што вырабляецца на тэрыторыі Саюзнай дзяржавы, і каардынацыі дзеянняў па ўзаемным развіцці вытворчых магутнасцяў”.

Раней у гэты дзень Мантураў сустрэўся з Аляксандрам Лукашэнкам. Той паведаміў расійскаму госцю, што ў дзвюх краін дастаткова сумесных праектаў, “нават больш <…> аб’ёмаў грошай, якія Расія выдзеліла ў якасці крэдытаў”. “Магчыма, мы дамовімся, што Расія будзе зацікаўленая ў новых нашых праектах і будзе павялічанае гэтае фінансаванне. Але гэта ўжо будзе ў выніку вашых перамоваў [з урадам Беларусі]”, — сказаў Лукашэнка.

“Мы паставілі перад сабой амбіцыйную задачу, зноў разам з расіянамі, пераадолець залежнасць ад імпарту і сур’ёзна заняліся імпартазамяшчэннем, — дадаў ён. — Я думаю, што гэта вялікі кавалак вашай працы ў Беларусі з нашым урадам, каб вызначыцца, як будзем дзейнічаць далей”.

Спікер падзякаваў суразмоўцу і кіраўніцтву РФ агулам за тое, што расійскі бок прафінансаваў “многія сумесныя імпартазамяшчальныя праекты”.

“Ёсць і такія знакавыя, глабальныя праекты, як фінансаванне і вытворчасць самалёта “Асвей”, — заявіў Лукашэнка. — Для нас гэта наогул, можна сказаць, новая гісторыя. <…> Можа быць, з гэтага самалёта і пачнецца эра авіябудавання ў Беларусі”.

11 кастрычніка Лукашэнка падпісаў закон, які ратыфікуе міжурадавае пагадненне Беларусі і Расіі “аб распрацоўцы і арганізацыі серыйнай вытворчасці двухрухальнага лёгкага шматмэтавага самалёта “Асвей”.

Сцвярджалася, што прыняцце гэтага закона “дазваляе стварыць у Беларусі ўмовы для фарміравання ўласнай авіябудаўнічай галіны”.

Інвестыцыйны праект па распрацоўцы 19-мясцовага самалёта “Асвей” і арганізацыі яго серыйнай вытворчасці на базе 558-га авіяцыйнага рамонтнага завода (Баранавічы, Брэсцкая вобласць) рэалізуецца ў рамках комплекснай міжведамаснай праграмы па супрацоўніцтве з РФ у галіне авіябудавання.

За рэалізацыю доследна-канструктарскай работы па распрацоўцы самалёта адказваюць Дзяржаўны ваенна-прамысловы камітэт Беларусі і Міністэрства прамысловасці і гандлю Расіі. Галоўны выканаўца з расійскага боку — Уральскі завод грамадзянскай авіяцыі, беларускі сувыканавец — 558-ы авіяцыйны рамонтны завод.

Аб стварэнні сумеснага з Расіяй самалёта паведаміў 10 ліпеня 2023 года на міжнароднай прамысловай выставе “Інерпрам-2023” у Екацярынбургу Галоўчанка.

28 студзеня гэтага года Пётр Пархомчык, які тады займаў пасаду віцэ-прэм’ера (цяпер старшыня Брэсцкага аблвыканкама), заявіў у эфіры беларускага тэлебачання, што першыя беларуска-расійскія самалёты плануецца выпусціць “да 2026 года”, да 2030-га іх колькасць павінна скласці “85–100 штук”. Тады ён паведаміў, што для рэалізацыі праекта “трэба будзе пабудаваць 20 тыс. квадратных метраў дадатковых вытворчых плошчаў і набыць каля сотні адзінак высокаскладовага абсталявання”.

15 красавіка Пархомчык і Мантураў, які на той момант таксама займаў пасаду міністра прамысловасці і гандлю РФ, падпісалі ў Маскве пагадненне аб сумеснай вытворчасці лёгкага шматмэтавага самалёта “Асвей”.

558-ы авіярамонтны завод знаходзіцца пад заходнімі санкцыямі.