У краінах СНД за некалькі дзён затрымана больш за 300 чалавек, абвешчаных у вышук у Беларусі — МУС

30 кастрычніка, Позірк. У рамках міждзяржаўнага спецмерапрыемства “Вышук” у краінах СНД затрымана больш за 300 чалавек, якія абвешчаныя ў вышук у Беларусі, паведамляе тэлеграм-канал ведамасных выданняў МУС “На варце” і “Міліцыя Беларусі”.

Адзначаецца, што звыш 140 з іх затрымана на тэрыторыі Расіі.

Таксама падчас спецмерапрыемства “ўстаноўлена месцазнаходжанне больш за 100 зніклых без вестак, амаль 500 адказчыкаў і даўжнікоў”.

На тэрыторыі Беларусі ў рамках аперацыі затрымана больш за 70 злачынцаў, “устаноўлена месцазнаходжанне пяці без вестак зніклых, якіх шукалі іншыя дзяржавы”.

Актыўная фаза спецыяльнага комплекснага мерапрыемства “Вышук” праходзіла 23 і 24 кастрычніка. Ведамствы якіх краін СНД, акрамя Расіі, удзельнічалі ў аперацыі, не пазначана. Мэта спецмерапрыемства — “павышэнне эфектыўнасці ўзаемадзеяння праваахоўнікаў з розных краін па вышуку абвінавачаных, месцазнаходжанне якіх невядома, грамадзян, якія хаваюцца ад органаў, якія вядуць крымінальны працэс, якія ўхіляюцца ад адбыцця пакарання, без вестак зніклых, адказчыкаў па грамадзянскіх і эканамічных справах”.

“У прыватнасці, для ўстанаўлення месцазнаходжання і затрымання названых асоб пры правядзенні аператыўна-вышуковых мерапрыемстваў, што рэалізуюцца калегамі з Расіі, у гэтую краіну накіроўваліся супрацоўнікі галоўнага ўпраўлення крымінальнага вышуку МУС і тэрытарыяльных органаў унутраных спраў Беларусі”, — гаворыцца ў паведамленні.

Сярод затрыманых у Маскве, як сцвярджаецца, — дырэктар аднаго з мінскіх турыстычных агенцтваў, якая “на падставе аказання турыстычных паслуг падманным шляхам завалодала грашовымі сродкамі больш за 30 грамадзян на агульную суму звыш 140.000 рублёў”.