Літоўскія памежнікі збілі дрон, які заляцеў з Беларусі з кантрабанднымі цыгарэтамі на 5,5 тыс. еўра

23 верасня, Позірк. У Шальчынінскім раёне збіты беспілотнік, які заляцеў з тэрыторыі Беларусі з 1 тыс. пачкаў беларускіх цыгарэт — гэта 58-ы з пачатку года перахоп падобных дронаў, паведамляе Служба аховы дзяржаўнай мяжы Літвы (САДМ).

Інцыдэнт здарыўся каля вёскі Лішкунішкес. Адзначаецца, што, заўважыўшы беспілотнік з грузам на экране цеплавізара, памежнікі “неадкладна ўжылі сваё службовае супрацьбеспілотнае абсталяванне, у выніку чаго БПЛА пачаў пасадку ў лясістай мясцовасці”.

У двух выяўленых пакетах былі дзве завадскія каробкі цыгарэт “Мінск Суперслімс”. Іх кошт ацэньваецца ў 5.510 еўра.

Па гэтым факце распачатая адміністрацыйная вытворчасць.

САДМ адзначае, што ў 2025 годзе памежнікі перахапілі 59 БПЛА з кантрабандай, якія ляцелі з Беларусі, у 2024-м — 54.