Швейцарыя далучылася да чэрвеньскага санкцый ЕС супраць Беларусі і пашырыла свае абмежаванні
30 кастрычніка, Позірк. Швейцарыя далучылася да чэрвеньскага пакета санкцый ЕС у дачыненні да Беларусі, а таксама ўвяла новыя абмежаванні на нацыянальным узроўні. Пра гэта паведамляецца на сайце швейцарскага ўрада.
Новыя санкцыі Швейцарыі прадугледжваюць забарону на інвестыцыі ў кампаніі, якія працуюць у беларускім энергетычным сектары.
Больш жорсткімі сталі абмежаванні ў гандлі: забараняецца імпарт золата, алмазаў, вугалю і сырой нафты з Беларусі, а таксама экспарт у Беларусь прадметаў раскошы, тавараў для перапрацоўкі нафты і звадкаванні прыроднага газу, тавараў для ўмацавання беларускіх прамысловых магутнасцяў, авіяцыйнага паліва і паліўных прысадак, тавараў марскога флоту.
“Акрамя гэтага, існуючыя забароны — напрыклад, на тавары падвойнага прызначэння — распаўсюджваюцца і на транзіт гэтых тавараў праз тэрыторыю Беларусі. Як і ў выпадку з санкцыямі супраць Расіі, уводзіцца кантрактнае абавязацельства для экспарцёраў забараніць рээкспарт з трэцяй краіны ў Беларусь пэўных камплектуючых, у тым ліку тых, якія ўбудаваныя ў абсталяванне, якое выкарыстоўваецца для вядзення вайны супраць Украіны. Гэтая мера закліканая прадухіліць абыход санкцый, якія дзейнічаюць у Швейцарыі, праз трэція краіны”, — гаворыцца ў паведамленні.
Разам з тым Швейцарыя вырашыла не далучацца да абмежаванняў ЕС, якія прадугледжваюць “шырока сфармуляваныя абавязацельствы” для матчыных прадпрыемстваў не дапускаць “падрыва санкцый” за кошт дзейнасці даччыных кампаній у трэціх краінах. Таксама швейцарскі ўрад не падтрымаў палажэнне ЕС аб “належнай абачлівасці для прадухілення рээкспарту высокапрыарытэтных тавараў у Беларусь”, бо кампаніі Швайцарыі “ўжо абавязаныя паводле закона выконваць санкцыі”.
“Падаўжэнне забароны на грузавыя перавозкі таксама не было прынятае”, — падкрэсліваецца ў паведамленні.
Змены набудуць моц 31 кастрычніка.
Сёлета 29 чэрвеня Савет ЕС прыняў новыя абмежавальныя меры эканамічнага характару ў дачыненні да Беларусі ў сувязі з удзелам рэжыму Аляксандра Лукашэнкі ў расійскай агрэсіі супраць Украіны.
У сферы транспарту ЕС пашырыў забарону на перавозку грузаў аўтатранспартам па тэрыторыі ЕС прычэпамі і паўпрычэпамі з беларускай рэгістрацыяй, у тым ліку пры перавозцы грузавікамі, зарэгістраванымі не ў Беларусі. Каб мінімізаваць рызыку абыходу санкцый, зарэгістраваным у ЕС кампаніям, якія належаць беларускім фізічным або юрыдычным асобам на 25% або больш, “павінна быць забаронена станавіцца аўтатранспартным прадпрыемствам або перавозіць тавары аўтатранспартам у саюзе, у тым ліку транзітам”.
У адпаведнасці з новымі санкцыямі, матчыныя кампаніі ў краінах ЕС павінны будуць “прыкладаць усе намаганні, каб іх даччыныя кампаніі ў трэціх краінах не прымалі ўдзелу ў дзейнасці, якая прыводзіць да наступстваў, якія гэтыя санкцыі закліканы прадухіліць”.
Адзначалася, што новыя меры ЕС дублююць санкцыі, якія ўжо ўведзеныя ў дачыненні да Расіі. Такім чынам, яны закліканы вырашыць праблему абыходу абмежаванняў, абумоўленую “высокай ступенню інтэграцыі паміж расійскай і беларускай эканомікамі”.