Беларуская дыяспара пачынае маніторынг выканання ў Грузіі права на прытулак
Прадстаўнікі беларускай дыяспары на адным з пікетаў у Тбілісі супраць адмовы грузінскіх уладаў даваць палітычны прытулак. У цэнтры — Раман Кісляк
14 лістапада, Позірк. Маніторынг выканання ў Грузіі права на палітычны прытулак ў адносінах для грамадзян Беларусі пачынае 14 лістапада беларуская дыяспара, ён працягнецца мінімум паўгода, паведаміў “Позірку” праваабаронца, намеснік старшыні арганізацыі “Беларуская дыяспара Аджарыі” Раман Кісляк.
Паводле яго слоў, цяпер ёсць “несістэмныя веды” аб сітуацыі, а пасля маніторынгу можна будзе “даць рэальную карціну, як гэта насамрэч адбываецца ў Грузіі”.
“Мы цяпер атрымліваем інфармацыю аб парушэннях: дакументы губляюцца ў дэпартаменце міграцыі. Людзі і арыгіналы прадстаўляюць, і копіі, частка знікае”, — сказаў Кісляк.
Акрамя таго, паводле яго слоў, існуе праблема зацягвання разгляду спраў аб прадастаўленні прытулку. “Мы на гэта ўжо паказалі, праводзілі пікеты“, — адзначыў суразмоўца.
Выніковая справаздача, паведаміў ён, будзе мінімум на трох мовах: грузінскай, беларускай, англійскай.
“Грузінскія ўлады павінны разумець, што гэтая частка рэальнасці стане вядомая не толькі ім самім, але і партнёрам, міжнародным праваабарончым арганізацыям, іншым краінам”, — заявіў Кісляк.
Праваабаронцу вядома прыкладна пра 20 адмоваў беларусам у прытулку, і гэта “досыць шмат”, бо агулам блізу 60 суайчыннікаў падаліся на атрыманне гэтага статусу ў Грузіі. Сам Кісляк таксама атрымаў адмову і цяпер судзіцца з уладамі.
Падрабязнасці даступныя падпісчыкам “Позірк+“
