Дзяржпагранкамітэт абвінаваціў палякаў у вытурэнні на беларускую тэрыторыю збітага мігранта

30 лістапада, Позірк. Знясіленага грамадзяніна Егіпта знайшоў 29 лістапада ў Свіслацкім раёне (Гродзенская вобласць) непадалёк ад мяжы з Польшчай беларускі пагранічны нарад, паведамляе прэс-служба Дзяржпагранкамітэта.

Сцвярджаецца, што мужчына “амаль не размаўляў”, апрача “бачных слядоў ад збіцця” ён меў “нерухомую руку”.

“Памежнікі аператыўна выклікалі брыгаду хуткай мэдычнай дапамогі. Мужчыну даставілі ў Свіслацкую цэнтральную раённую бальніцу”, — гаворыцца ў паведамленні.

Беларускія ўлады рэгулярна паведамляюць пра пакуты, фізічныя траўмы і гібель замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не паведамляе, як мігранты аказваюцца на мяжы з краінамі ЕС у зоне адказнасці пагранічнага ведамства.

Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Згодна з праведзеным “Позіркам” аналізам даных памежных службаў, з пачатку 2024 года гэтыя краіны прадухілілі каля 35,5 тыс. спробаў замежнікаў незаконна перасекчы мяжу з боку Беларусі, у тым ліку Польшча — не менш за 29,2 тыс.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, таму што іх туды “паклікалі”.

“Мы да ўвядзення санкцый вельмі сур’ёзна з Захадам супрацоўнічалі, аж да таго, што заключылі дагавор аб рэадмісіі. Пасля яны ад гэтага адмовіліся. Мы лавіць іх не будзем. Наша справа — гарантаваць бяспеку народа”, — сказаў ён, у прыватнасці, сёлета 2 ліпеня.

“Галоўнае ў тым, што я не маю намеру аддаваць загад пагранічнікам, вайскоўцам ды іншым, каб яны абаранялі Еўрапейскі саюз на мяжы Беларусі і Польшчы. Вы накінулі пятлю на нашу шыю і яшчэ прымушаеце нас, каб мы абаранялі вас ад гэтых небаракаў”, — заявіў Лукашэнка.