Дзеянне буфернай зоны на мяжы з Беларуссю могуць падоўжыць без павелічэння плошчы — польскія СМІ
3 снежня, Позірк. Праект пастановы, якая падаўжае тэрмін дзеяння буфернай зоны на мяжы з Беларуссю яшчэ на 90 дзён, апублікаваны на сайце польскага ўрадавага цэнтра, паведаміў 3 снежня партал misyczne.pl.
Згодна з дакументам, які, як чакаецца, павінен набыць моц 10 снежня, плошчу буфернай зоны змяняць не плануецца, яна застанецца роўнай 60,67 км2.
Варта адзначыць, што змест дакумента супярэчыць словам міністра ўнутраных спраў і адміністрацыі Польшчы Томаша Сямоняка. Напярэдадні чыноўнік заявіў, што гэтую зону плануецца пашырыць.
Буферная зона пачала дзейнічаць на польска-беларускай мяжы 13 чэрвеня, 11 верасня тэрмін яе дзеяння быў падоўжаны на чарговыя 90 дзён. Польскія ўлады спачатку рапартавалі, што са з’яўленнем буфера плыні нелегалаў значна скараціліся, аднак 26 верасня віцэ-прэм’ер — міністр нацыянальнай абароны Уладзіслаў Касіняк-Камыш заявіў пра узмацненне ціску на мяжы.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
3 кастрычніка Сямоняк заявіў, што ў кантэксце Беларусі Польшча робіць у міжнародных адносінах усё, каб спыніць крызіс на мяжы. Ён таксама прызнаўся, што сітуацыя на мяжы з Беларуссю стала “адным з самых сур’ёзных крызісаў” для польскай дзяржавы і “велізарным выклікам” для яе самой.
Згодна з праведзеным “Позіркам” аналізам статыстычных даных памежных службаў, ад пачатку 2024 года суседнія краіны ЕС прадухілілі больш за 35,5 тыс. спробаў пранікнення нелегалаў з беларускай тэрыторыі, у тым ліку Польшча — звыш 29,3 тыс.