Ксёндз Акалатовіч прыгавораны да 11 гадоў зняволення за “здраду дзяржаве”

30 снежня, Позірк. Да 11 гадоў пазбаўлення волі прыгавораны Мінскім абласным судом каталіцкі святар, пробашч касцёла ў Валожыне Генрых Акалатовіч, паведамляе партал katolik.life.

Ксёндз прызнаны вінаватым паводле арт. 356 Крымінальнага кодэкса (здрада дзяржаве).

Адзначаецца, што ён “не прызнаваў віну”.

Працэс праходзіў у закрытым рэжыме, яго вёў суддзя Уладзімір Арэшка. У публікацыі гаворыцца, што на абвяшчэнне прысуду “не прыйшоў ніхто з епіскапату і нунцыятуры”.

“64-гадовы пробашч <…> пасля затрымання правёў больш за год у СІЗА КДБ <…>. Працэс доўжыўся больш за месяц. За ўвесь гэты час ніякай інфармацыі пра справу святара не з’явілася. У чым канкрэтна яго абвінавачваюць, застаецца невядомым і цяпер”, — падкрэсліваецца ў паведамленні.

Раней паведамлялася, што ксяндза абвінавачвалі ў перадачы неназваным асобам інфармацыі, што нібыта нанесла дзяржаве шкоду ў памеры каля 1 млн рублёў.

Сцвярджаецца, што “ўпершыню ў Беларусі з часоў камуністычнага рэжыму каталіцкага святара судзілі паводле крымінальнага палітычнага артыкула”.

Паводле звестак праваабаронцаў, Акалатовіч мае праблемы са здароўем. Раней ён перанёс інфаркт, пакутаваў ад анкалагічнага захворвання.

Прызнаны палітвязнем.

З 2020 года ў Беларусі працягваюцца ганенні на святароў і вернікаў. Паводле даных ініцыятывы “Хрысціянская візія”, з 1 верасня 2020 года па 30 лістапада 2024-га пераследам у Беларусі падвергнулася 86 хрысціянскіх служыцеляў.