Колькасць затрыманых у Польшчы за дапамогу нелегальнай міграцыі праз мяжу з Беларуссю зменшылася за год на 40%

5 студзеня, Позірк. 316 чалавек было затрымана ў 2024 годзе ў Падляскім ваяводстве па падазрэнні ў дапамозе нелегальнай міграцыі праз беларуска-польскую мяжу, паведамляе агенцтва PAP.

У 2023 годзе “такіх людзей было больш за 530”, адзначае партал gosc.pl.

З прыведзенай статыстыкі вынікае, што колькасць затрыманых зменшылася на 40,4%.

“Памежныя пракуратуры ў Падляскім ваяводстве <…> з пачатку міграцыйнага крызісу <…> вядуць дзясяткі спраў аб кантрабандзе людзей праз мяжу з Беларусі ў Польшчу”, — гаворыцца ў публікацыі.

Адзначаецца, што пракуратура Гайнаўскага павета летась перадала ў суд 82 крымінальныя справы, якія “скончыліся альбо абвінавачваннем, альбо хадайніцтвам аб вынясенні прыгавора без правядзення слухання”.

У публікацыі прыводзіцца прыклад 35-гадовай грамадзянкі Украіны, якой пагражае да васьмі гадоў зняволення за “кантрабанду” з Беларусі ў Польшчу пецярых нелегалаў з Афганістана.

Паведамляецца, што афганцы “вылецелі са сваёй краіны ў Маскву”, адкуль у суправаджэнні “кантрабандыстаў” былі дастаўленыя ў Беларусь. “Ім удалося перасекчы мяжу з Польшчай, і ўкраінка павінна была перавезці іх у Германію. Праз арганізатараў кантрабанды мігранты атрымалі фатаграфію аўтамабіля, які яны павінны былі шукаць у адведзеным для гэтага месцы. Праехаўшы некалькі сотняў метраў, аўтамабіль быў спынены памежнікам”, — удакладняе медыя.

Таксама згадваецца затрыманая ў траўні “польская пара”, якая транспартавала семярых нелегальных мігрантаў з Сірыі і Самалі “ў грузавым адсеку спецыяльна арандаванага фургона”.

“З іх тлумачэнняў вынікае, што кантакт з арганізатарамі кантрабанды яны знайшлі ў інтэрнэце і гэта быў адзіны спосаб з імі звязацца. Яны павінны былі атрымаць 3.000 злотых (каля 725 долараў. — “Позірк”.) за тое, што забяруць мігрантаў з памежнай зоны і перавязуць іх углыб краіны”, — адзначаецца ў публікацыі.

У 2024 годзе суседнія краіны Еўрапейскага саюза зафіксавалі 36.291 спробу мігрантаў нелегальна перасекчы мяжу з боку Беларусі — на 13,8% менш, чым у 2023-м (42.078), сведчыць праведзены “Позіркам“ аналіз даных памежных службаў.

На польскім участку мяжы Еўрасаюза за год зарэгістраваныя 29.972 такія спробы (+17,2%; 25.571), латвійскім — 5.317 (-61,7%; 13.863), літоўскім — 1.002 (-62,1%; 2.644).

Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды “паклікалі”.

“Мы да ўвядзення санкцый вельмі сур’ёзна з Захадам супрацоўнічалі, аж да таго, што заключылі дагавор аб рэадмісіі. Пасля яны ад гэтага адмовіліся. Мы лавіць іх не будзем. Наша справа — гарантаваць бяспеку народа”, — сказаў ён, у прыватнасці, 2 ліпеня 2024 года.

“Галоўнае ў тым, што я не маю намеру аддаваць загад пагранічнікам, вайскоўцам ды іншым, каб яны абаранялі Еўрапейскі саюз на мяжы Беларусі і Польшчы. Вы накінулі пятлю на нашу шыю і яшчэ прымушаеце нас, каб мы абаранялі вас ад гэтых небаракаў”, — заявіў Лукашэнка.