Рассельгаснагляд забараніў увоз у Беларусь чатырох тон хурмы і мандарынаў

17 студзеня, Позірк. Увоз у Беларусь чатырох тон хурмы і мандарынаў забараніла ўпраўленне Федэральнай службы па ветэрынарным і фітасанітарным наглядзе (Рассельгаснагляд) па Бранскай, Смаленскай і Калужскай абласцях РФ.

Як адзначае прэс-служба ведамства, згаданы груз перавозіўся ў грузавым аўтамабілі, спыненым для кантролю.

“Падчас дагляду грузаў і праверкі суправаджальных дакументаў інспектары ўпраўлення Рассельгаснагляду выявілі, што прадукцыя з высокай фітасанітарнай рызыкай агульнай масай каля чатырох тон перавозілася ў Рэспубліку Беларусь у суправаджэнні падробленага фітасанітарнага сертыфіката”, — гаворыцца ў паведамленні.

8 кастрычніка 2024 года Рассельгаснагляд паведаміў пра абмежаванне паставак у Расію прадукцыі трох беларускіх прадпрыемстваў. Адзначалася, што ў ялавічыне прадпрыемства “Велес-Міт” (Маладзечанскі мясакамбінат, Мінская вобласць) паўторна знойдзеныя бактэрыі лістэрыі. У гатовых мясных прадуктах Глыбокскага мясакамбіната (Віцебская вобласць) зноў знойдзены антыбіётык азітраміцын. У сухім малацэ Лунінецкага малочнага завода (Брэсцкая вобласць) расійскія спецыялісты паўторна выявілі перавышэнне колькасці мезафільных аэрабных і факультатыўна анаэробных мікраарганізмаў.

16 верасня стала вядома, што Рассельгаснагляд узяў пад узмоцнены кантроль пастаўкі прадукцыі пяці беларускіх прадпрыемстваў.

Гаворка ішла пра прадукцыю “Шчучынскага філіяла Гродзенскага абласнога спажывецкага таварыства цэх мясных паўфабрыкатаў” (у ялавічыне выяўленыя хіналоны — група антыбактэрыйных прэпаратаў), філіяла Барысаўскага мясакамбіната і каўбаснага цэха ААТ “Александрыйскае” (бактэрыі групы кішачнай палачкі ў ялавічыне); Жабінкаўскага камбікормавага завода (незарэгістраваныя і (або) перавышаючыя зарэгістраваныя лініі ГМА-кампанента ў карме сухім для котак), а таксама філіяла “Юніміт” прадпрыемства “Смалявічы Бройлер” (перавышэнні паказчыкаў тэсту на мікробную бяспеку ў паўфабрыкатах з птушкі).

Акрамя таго, у сувязі з “паўторным выяўленнем энрафлаксацыну ў кансервах з мяса птушкі для дзіцячага харчавання” былі часова абмежаваныя пастаўкі прадпрыемства “Белфуд Прадакшн”.

30 жніўня Рассельгаснагляд паведамляў пра вяртанне з Расіі на тэрыторыю Беларусі 470 кг ветэрынарных прэпаратаў.

Ведамства рэгулярна паведамляе пра спыненне кантрабанды тавараў з Беларусі.

24 ліпеня стала вядома пра вяртанне ў Беларусь 600 кг кантрафактных буякоў. Ягады везлі праз фітасанітарны кантрольны пункт Далосцы (Себежскі раён Пскоўскай вобласці РФ). Пункт знаходзіцца ля мяжы з Расонскім раёнам Віцебскай вобласці.

15 ліпеня Рассельгаснагляд паведаміў пра выяўленне “факта кантрабанды нарвежскай рыбнай прадукцыі праз Беларусь у Расію”.

Ведамства заявіла, што ў чэрвені 2024 года на аўтадарозе М1 Масква — Мінск быў спынены “транспартны сродак, які перавозіць рыбную прадукцыю сумнеўнага паходжання”. “У выніку кантрольных мерапрыемстваў выяўленыя парушэнні ў маркіроўцы тавару, таксама маюцца абгрунтаваныя сумненні ў сапраўднасці прадстаўленых ветэрынарных суправаджальных дакументаў”, — адзначыў Рассельгаснагляд.

У чэрвені ўпраўленне Рассельгаснагляду па Бранскай, Калужскай і Смаленскай абласцях вярнула ў Беларусь 5,4 тыс. харчовых курыных яек, якія везлі без дакументаў у “бруднай машыне”.