By_Help звярнуўся па дапамогу ў фінансаванні выдаткаў
Кіраўнік By_Help Аляксей Лявончык
20 студзеня, Позірк. Адна з дзвюх найбуйнейшых ініцыятыў дапамогі рэпрэсаваным беларусам By_Help звярнулася па фінансавую дапамогу.
“Пасля перадвыбарных “пагромаў” колькасць зваротаў да нас падвоілася“, — адзначыў у “Фэйсбуку“ яе заснавальнік і кіраўнік Аляксей Лявончык.
“Ініцыятыва працягвае плаціць штрафы, судовыя і іншыя выдаткі, якія рэжым накладае на рэпрэсаваных, збанкрутаваўшы іх. Хуткасць нашай рэакцыі — дзень з моманту атрымання заяўкі да кантакту, тры тыдні да аплаты”, — паведаміў ён.
Аднак, як адзначыў Лявончык, без каманды, якая “вымушаная працаваць ва ўмовах пагаршэння бяспекі, не абысціся”.
“Акрамя павелічэння колькасці заявак на дапамогу і колькасці палітвязняў, якіх мы падтрымліваем, мы таксама дапамагаем партнёрскім ініцыятывам даставіць іх дапамогу адрасатам, — гаворыцца ў абгрунтаванні збору. — Усё гэта азначае неабходнасць павялічваць каманду і плаціць людзям заробак (хоць ніякія сродкі не могуць кампенсаваць патэнцыйную рызыку атрымаць 8+ гадоў турмы для злоўленага кур’ера By_Help)“.
Фонду неабходна сабраць 15 тыс. еўра. Да 21:00 20 студзеня паступіла больш за 4 тыс. еўра.
“Рэпрэсіі і дзяржаўны тэрор па-ранейшаму застаюцца вызначальнымі рысамі ўнутранай палітыкі таталітарнага рэжыму” Аляксандра Лукашэнкі, гаварылася ў падрыхтаваным праваабарончым цэнтрам “Вясна” аглядзе сітуацыі з правамі чалавека ў Беларусі ў снежні 2024 года.
Праваабаронцы канстатавалі, што “мішэнню для пераследу становяцца ўсе, каго можна падазраваць у нелаяльнасці ўладам”.
Згодна з дакументам, на працягу снежня зафіксавана прынамсі 759 выпадкаў палітычна матываваных рэпрэсій (затрыманняў, ператрусаў і інш.), якія “вынікаюць з крымінальнага і адміністрацыйнага пераследу“.
Прэзідэнцкія выбары 2025 года ў Беларусі “не могуць быць свабоднымі і справядлівымі ва ўмовах цяперашняй рэпрэсіўнай абстаноўкі ў краіне“, гаварылася ў апублікаванай 17 студзеня заяве дзяржаўнага сакратара ЗША Энтані Блінкена.
“Злучаныя Штаты асуджаюць кампанію рэпрэсій з боку рэжыму Лукашэнкі і яго спробы легітымізаваць выбары, якія не могуць быць свабоднымі ці справядлівымі, — заявіў кіраўнік Дзяржаўнага дэпартамента. — Рэпрэсіі спароджаныя слабасцю, а не сілай. Беспрэцэдэнтныя меры па падаўленні любой апазіцыі ясна паказваюць, што рэжым Лукашэнкі баіцца ўласнага народа. Храбрасць беларусаў унутры краіны і за яе межамі дае свае вынікі”.
Гл. таксама:
Вынікі-2024. Кіраўнік фонду By_Help: На нас пачалося паўнавартаснае паляванне