Беларусь здольная стварыць атамную бомбу — Лукашэнка

21 студзеня, Позірк. Беларускія спецыялісты могуць вырабіць “любую тэхніку, аж да касмічных апаратаў і атамнай бомбы”, “пытанне толькі ў часе і грошах”, заявіў 21 студзеня Аляксандр Лукашэнка падчас наведвання Мінскага аўтамабільнага завода.

У Беларусі “добрыя канструктары і зборачныя вытворчасці”, цытуе Лукашэнку яго прэс-служба. Пры гэтым спікер, вынікае з яго слоў, сумняецца, “ці патрэбна гэтая прадукцыя Беларусі”. “Ракеты ў космас наша краіна не запускае, а з узбраеннем дапамагаюць браты-расіяне”, — удакладніў ён.

“Трэба для людзей нешта рабіць. Гэта значыць, трэба ўкладаць грошы туды, дзе мы ўмеем, разбіраемся, нешта робім”, — заявіў Лукашэнка.

Пра тое, што на тэрыторыі Беларусі сапраўды ёсць ядзерная зброя, Лукашэнка заявіў 10 снежня 2024 года, адказваючы на пытанні работнікаў барысаўскага прадпрыемства “ПАЖСНАБ” (Мінская вобласць).

Дзяржаўны сакратар Савета бяспекі Аляксандр Вальфовіч 6 снежня паведаміў, што ў Лукашэнкі ёсць асабісты “ядзерны чамаданчык” з “чырвонай кнопкай”.

Напрыканцы лістапада аб’яднанне былых сілавікоў BelPol апублікавала гадзінны фільм-расследаванне “Ядзерная зброя ў Беларусі: выкрыццё хлусні дыктатараў”, у якім гаворыцца, што “на дадзены момант няма ніякай пацверджанай інфармацыі і доказаў пра размяшчэнне на тэрыторыі Беларусі ядзернай зброі”.

Пасля палёту ў космас у сакавіку 2024 года бортправадніцы авіякампаніі “Белавія” Марыны Васілеўскай Лукашэнка прылічыў Беларусь да касмічных дзяржаў. Палёт беларускі на Міжнародную касмічную станцыю адбыўся ў складзе расійскага карабля “Саюз МС-25”, усе выдаткі ўзяла на сябе Расія.