Вызначаныя тавары і паслугі, дзяржзакупкі якіх у 2025–2026 гадах магчымыя з адной крыніцы

22 студзеня, Позірк. Тавары і паслугі, набыццё якіх у 2025–2026 гадах магчымае з адной крыніцы, вызначаныя пастановай Савета міністраў з папраўкамі ў заканадаўства аб дзяржаўных закупках.

Прэс-служба ўрада 22 студзеня паведаміла, што адпаведная працэдура распаўсюджваецца на набыццё:

• паслуг па распрацоўцы праекта адвядзення зямельнага ўчастка;
• работ (паслуг) па ўнясенні змен у перадпраектную (перадінвестыцыйную), праектную дакументацыю ў яе распрацоўшчыка;
• бензіну і (або) драўнянага, тарфянога, пячнога бытавога, дызельнага паліва;
• паслуг па зарадцы электрамабіляў;
• паслуг па распрацоўцы, дапрацоўцы, мадэрнізацыі, інфармацыйным і тэхнічным суправаджэнні афіцыйных інтэрнэт-сайтаў дзяржаўных органаў і арганізацый;
• паслуг па правядзенні сацыялагічных даследаванняў;
• паслуг па перасылцы паштовых адпраўленняў.

Згодна з пастановай, пералік тавараў, дзяржзакупкі якіх ажыццяўляюцца з дапамогай біржавых таргоў, дапоўнены:

• культурамі злакавымі (акрамя рысу);
• бабовымі;
• мукой кармавой мяса-касцяной;
• алеем сланечнікавым і сафлоравым ды інш.