23 студзеня, Позірк. Камітэт дзяржаўнай бяспекі 22 студзеня ўнёс яшчэ 17 чалавек у спіс “асоб, якія маюць дачыненне да тэрарыстычнай дзейнасці”.
У пералік, апублікаваны ў тэлеграм-канале КДБ, уключаныя Уладзімір Раманенка, Максім Сандракула, Вітольд Шалкевіч, Наталля Антонава, Дзмітрый Голуб, Дзмітрый Колабаў, Максім Чахоўскі, Віталь Пацехін, Сяргей Ціханаў, Вікторыя Дамастой, Таццяна Сцепа, Алег Пятроўскі, Максім Мыслівец, Арцём Ліцевіч, Андрэй Сітнікаў, Леанід Церабей, а таксама лідар незалежнага прафсаюза наваполацкага ААТ “Нафтан” (Віцебская вобласць) Вольга Брыцікава.
Усе яны, акрамя Церабея, прызнаныя палітвязнямі.
Церабей, Шалкевіч, Антонава, Колабаў, Голуб і Дамастой (маці траіх непаўналетніх дзяцей) з’яўляюцца абвінавачанымі паводле арт. 130 Крымінальнага кодэкса (распальванне расавай, нацыянальнай, рэлігійнай альбо іншай сацыяльнай варожасці або варажнечы). Сандракуле інкрымінаваны арт. 293 (масавыя беспарадкі).
Астатнія ўключаныя ў спіс адбываюць пакаранне паводле артыкулаў КК, якія ўлады выкарыстоўваюць для пераследу палітычных апанентаў.
8 красавіка 2024 года Брыцікава была прыгавораная Віцебскім абласным судом у закрытым рэжыме да 3 гадоў пазбаўлення волі паводле арт. 130 КК. У жніўні 2024-га гэты ж суд таксама ў закрытым рэжыме прыгаварыў яе яшчэ да трох гадоў зняволення. Жанчыну прызналі вінаватай паводле ч. 3 арт. 361 (заклікі да мер абмежавальнага характару (санкцый), іншых дзеянняў, накіраваных на нанясенне шкоды нацыянальнай бяспецы), ч. 1 арт. 130 і ч. 1 арт. 3614 (садзейнічанне экстрэмісцкай дзейнасці).
20 снежня 2024 года адбыўся разгляд апеляцыйнай скаргі Брыцікавай у Вярхоўным судзе. Тэрмін другога прыгавора скарацілі на адзін год. Такім чынам, агульны тэрмін палітзняволенай складае 5 гадоў пазбаўлення волі ў калоніі агульнага рэжыму.
Брыцікава адпрацавала на “Нафтане” 16 гадоў, яе звольнілі праз палітычную пазіцыю. Была адным з лідараў пратэстнага руху на “Нафтане” пасля выбараў 2020 года, агучвала патрабаванні работнікаў да ўладаў і кіраўніцтва прадпрыемства.
У “спісе тэрарыстаў” 1.328 пазіцый і 1.228 чалавек; мінімум 540 з іх — грамадзяне Беларусі. Абвешчаным “тэрарыстамі” зняволеным забаронена атрымліваць грашовыя пераводы.
