Улады Беларусі маюць намер атрымаць ільготны крэдыт ад Кітая

25 студзеня, Позірк. Праект міжурадавага рамачнага пагаднення, якое прадугледжвае, што Кітай выдзеліць Беларусі льготны крэдыт, ухвалены пастановай беларускага Савета міністраў № 35 ад 23 студзеня.

Згодна з дакументам, апублікаваным на Нацыянальным прававым інтэрнэт-партале 25 студзеня, пагадненне зхваленае “ў якасці асновы для правядзення перагавораў”, якія будзе весці Міністэрства фінансаў.

Урад дазволіў ведамству да падпісання ўносіць у пагадненне змены, якія не маюць прынцыповага характару.

У пастанове Савета міністраў не пазначана, пра якія аб’ёмы запазычання гаворка, што за мэты, на якія запытваецца крэдыт.

19 студзеня амбасадар КНР Чжан Вэньчуань у эфіры тэлеканала СТБ заявіў, што ўведзеныя ў дачыненні да Мінска заходнія санкцыі “ў пэўнай ступені негатыўна паўплывалі” на эканамічную супрацу паміж Кітаем і Беларуссю.

Разам з тым, паводле слоў дыпламата, гэтыя абмежаванні “не могуць спыніць хвалю кітайска-беларускіх стасункаў, што нарастае”.

Супраца дзвюх краін у розных сферах, заявіў ён, “няўхільна развіваецца”, а механізмы гэтай супрацы “стала ўдасканальваюцца”.

13 снежня 2024 года Аляксандр Лукашэнка зацвердзіў Рэспубліканскі бюджэт на 2025 год, які прадугледжвае дэфіцыт у памеры 4 млрд 459,4 млн рублёў.

Міністр фінансаў Юрый Селіверстаў раней адзначаў, што практычна 1 млрд рублёў дэфіцыту бюджэту плануецца пагасіць за кошт “знешніх прыцягненняў”: “Частка гэтых сродкаў будзе прыцягнута з РФ у выглядзе крэдыту”.